“Son turlarda ağır oyunlar keçiririk. “Zirə”yə qarşı oyunumuz da çətin oldu”.
İdman.biz xəbər verir ki, bunu “Araz-Naxçıvan”ın futbolçusu Tural Bayramlı Azərbaycan Premyer Liqasının XV turunun “Zirə” ilə görüşü (0:0) barədə danışarkən deyib.
Yarımmüdafiəçi klubunun mətbuat xidmətinə bildirib ki, Naxçıvan təmsilçisi əbəs yerə liderlər qrupunda yer almayıb: “Düzdür, “Zirə”nin üst pillədə yer alması oyundan öncə bizdə hansısa narahatlıq yaratmamışdı. Çünki rəqibin kimliyindən asılı olmayaraq, meydana verilən tapşırıqları yerinə yetirmək üçün çıxırıq. Bizim tapşırığımız da, rəqibin kimliyindən asılı olmayaraq 3 xal qazanmaqdır. Komandamız liqanın yeni üzvü olsa da, çıxışımızı bu şəkildə davam etdirsək, həm rəqiblərimizə hər zaman başağrısı olacağıq, həm də xal ehtiyatımızı artıracağıq”.
Bayramlı XVII turun “Sabah”la oyunu haqda fikirlərini də bölüşüb: “Rəqibimiz son turlarda uğurlu nəticələr qazanır. Ümumiyyətlə, mövsümün əvvəlindən bu komanda medallara iddialı hesab olunur. Premyer Liqanın güclü klublarından biridir. Biz də bu görüşə yaxşı hazırlaşırıq. Hava yağışlı keçsə də, çalışırıq ki, məşqlərimizi axsatmayaq. Gərgin və maraqlı oyun olacaq. Yaxşı nəticə qazanmaq üçün mübarizəmizi davam etdirəcəyik. Həm də qış fasiləsi ərəfəsindəyik. İstəyirik ki, mövsümün “ekvator xətti”nə üst pillələrdən birində yollanaq”.
İdman.biz
