Azərbaycan millisinin və Yunanıstanın “Olimpiada İmitou” klubunun yarımmüdafiəçisi Vüsalə Seyfəddinovanın İdman.biz saytına müsahibəsi
- Yunanıstanın “Olimpiada İmitou” klubu ilə müqavilə imzaladın. Keçidin necə alındı?
- Millətlər Liqasında çıxışlarımız diqqət çəkib. Liqada son iki oyunumu izlədikdən sonra məni transfer etdilər.
- Təklifə dərhal cavab verdiz?
- Ən əsası karyeramı düşünərək təklifi qəbul etdim. Məqsədim Avropa klublarında çıxış etmək olub. Daha yaxşı komandalara keçmək üçün Yunanıstan əla fürsətdir.
- Maliyə şərtləri keçiddə nə dərəcədə rol oynadı? Türkiyədən daha çox maaş alacaqsan?
- Maaşlar demək olar ki, Türkiyə ilə eynidir. İkinci dövrədə kluba gəldiyim üçün belədir. Mövsümün əvvəlində şərtlər daha fərqli olacaq.
- Yunanıstanda dil problemi, ölkəyə, çempionata alışmaq hansısa çətinliklər yarada bilər?
- Bir qədər dil problemi olacaq. Amma bu məni qorxutmur. Önəmli olan məşqçilərin tapşırıqlarını düzgün yerinə yetirməkdir. İlk günlərdə çətinliklər olacaq, amma sonra hər şeyin yaxşı olacağına inanıram.
- Yunanıstandan sonra hansı ölkələrdə oynamaq istəyirsən?
- Ən böyük məqsədim TOP-5 liqada oynamaqdır. Yunanıstan mənim üçün böyük üstünlük olsa da, hər şey özümdən asılıdır. Çox çalışmalıyam. PAOK klubu da məni heyətində görmək istəyirdi. Sadəcə onlarda legioner limiti dolduğu üçün keçid alınmadı.
- TOP-5 liqada oynamaq istədiyini qeyd etdin. Konkret hansı klubda oynamağı arzulayırsan?
- Arzum “Real” və PSJ-nin formasını geyinməkdir. 23 yaşım var və çox çalışmalı olduğumu bilirəm.
- Səncə bu istəyini həyata keçirə biləcəksən?
- Bəli, buna inanıram. Amma bunun üçün daha çox əziyyət çəkməliyəm.
Emin Ağa
İdman.biz
