“Premyer Liqanın V turunda nəhayət ki, "Zirə"yə qalib gəldik. Həmin oyun çox gərgin keçdi, çox çətin görüş oldu”.
Bunu idman.biz saytına "Qəbələ"nin müdafiəçisi Murad Musayev deyib.
Təcrübəli müdafiəçi "Zirə"yə 1:0 hesabı ilə qalib gəldikləri oyun barədə danışıb. O bildirib ki, komandasının bundan başqa variantı olmayıb: “Bunadək bütün görüşlərdə məğlub olmuşduq, bu sarıdan qalibiyyət bizim üçün çox vacib idi. "Zirə" də çox güclü rəqib idi, bu mövsüm olduqca gözəl oyun sərgiləyirlər. İnanıram ki, bu qələbə bizim üçün geridönüş olacaq, növbəti oyunlarda bir növ motivasiya verəcək”.
Musayev növbəti turda qarşılaşacaqları “Turan Tovuz”la oyuna hazırlaşdıqların da plan üzrə getdiyini deyib: “Tovuz səfəri həmişə ağır keçir, yaxşı futbolçuları var, həm də rəqib meydanında azarkeş amili də bizə çətinlik yarada bilər. Amma həmin oyunda məqsədimiz qələbə qazanmaqdır. Oyuna var gücümüzlə hazırlaşırıq, yeni transferimiz də komandaya qoşulub, birlikdə məşq edirik, düşünürəm ki, gücünüzə güc qatacaq. Komandada ab-hava yüksək səviyyədədir, hər şey qaydasındadır. Çempionat hələ təzə başlayıb, qarşıda uzun zaman var, inanıram ki, itirdiyimiz xalların əvəzini çıxa biləcəyik”.
Qeyd edək ki, “Turan-Tovuz” – “Qəbələ” oyunu sentyabrın 17-də olacaq.
Ağa Dadaşzadə
İdman.biz
