"Yenidən meydanda olmaq gözəl hiss idi".
İdman.biz xəbər verir ki, bunu Azərbaycanın əfsanəvi futbol hakimi Tofiq Bəhramovun 100 illiyi münasibətilə keçirilən yubiley matçından sonra jurnalistlərə açıqlamasında veteran futbolçu Tərlan Əhmədov deyib.
O bildirib ki, qarşılaşma maraqlı məqamlarla yadda qalıb: "Əvvəla, bu oyunun təşkilatçıları - Gənclər və İdman Nazirliyi və Futbol Veteranlar İttifaqının sədri Oqtay Abdullayevə təşəkkür edirəm. Maraqlı matç alındı. Çox vaxt futbolçularla mətbuat nümayəndələri arasında ünsiyyət yaxşı olmur. Peşəkarlıq nöqteyi-nəzərindən bəzən danışa bilmirik, jurnalistlər də buna görə bizdən inciyir. Bu gün isə qardaşlıq görüşü oldu. Bu həm də dünya şöhrətli hakim Tofiq Bəhramovun yaşadılması idi. O, həqiqətən də böyük şəxsiyyət olub. 1966-ci ildə İngiltərə - Almaniya oyununda belə bir qərar verməyə hər oğulun cəsarəti çatmazdı. Bunu məhz Tofiq Bəhramov etmişdi".
Qeyd edək ki, matç futbol veteranlarının 8:3 hesablı qələbəsi ilə yekunlaşıb.
Aytac Sahəd
İdman.biz
