"Maraqlı oyun alındı. Hər iki komanda meydanda yaxşı mübarizə apardı. Bilirdik ki, bizi bu matçda nə gözləyir. Komanda yaxşı iş ortaya qoydu. Qələbə qazandıq. Bu oyunu unudub qarşıdakı çempionat matçına hazırlaşacağıq".
İdman.biz xəbər verir ki, bunu "Araz-Naxçıvan"ın baş məşqçisi Elmar Baxşıyev "Qarabağ"la oyundan sonra keçirilən mətbuat konfransında deyib.
O, Azərbaycan kuboku yarımfinal mərhələsinin ilk oyununda öz meydanında qazanılan 1:0 hesablı qələbəni şərh edib: "Bu gün məğlub olsaydıq da, heç bir üstünlüyümüz, əskikliyimiz olmayacaqdı. Bilirik ki, kimə qarşı oynayırıq. "Qarabağ" reklama ehtiyacı olmayan komandadır. Çempionat oyununa köklənmək lazımdır. Vaxtı çatanda kubokun cavab matçını da düşünəcəyik".
Qeyd edək ki, komandalar cavab matçı aprelin 23-də olacaq.
İdman.biz
