“İlk turdan komandanın hücumda rəngarəng görünməsini istəyirdim. Bu gün futbolçular bunu yerinə yetirdilər”.
İdman.biz xəbər verir ki, bunu “Qəbələ”nin baş məşqçisi Elmar Baxşıyev deyib.
Azərbaycan Premyer Liqasının XIV turunda 4:0 hesabı ilə qalib gələn komandanın çalışdırıcısı əks-hücumlarda uğulu çıxışı istiqamətində işlədiklərini bildirib: “Komandanın potensialı var və inanıram ki, oyundan-oyuna daha da yaxşı "Qəbələ" görəcəyik. Əks-hücumlar işlədiyimiz elementlərdən biridir. Hücumameyilli oyunçularımızın hamısı sürətlidir. Daha çox dominant futbol oynamağa çalışırıq. Amma top həmişə bizdə olmur. Topu ələ keçirdikdə, komandanın qarşısına sürətli əks-hücumlara çıxmaq vəzifəsi də qoyuruq. Bu gün istədiklərimiz alındı”.
Baxşıyev “Turan Tovuz”la oyunda het-trik edən Bilal Auaşeyrinin çıxışına toxunub: “Bilal universal futbolçudur. Bir neçə mövqedə oynaya bilər. Bu oyun üçün planımız onun sırf hücumçu kimi oynaması idi. Ola bilər, qarşıdakı matçda cinah yarımmüdafiəçisi kimi başlasın. Oyunumuzu rəqibə görə də qururuq. Amma nəinki Bilal, ehtiyatda olan futbolçularımızı da həmin mövqedə görə bilərik.
İdman.biz
