“Yığma və Azərbaycan çempionatı da sübut edir ki, klassik basketbol bu idman növünün gözəlliyidir. 3X3 növündə heç vaxt belə azarkeş və atmosfer olmur”.
Bunu “İdman Bizdə” verilişinin qonağı olan Azərbaycan millisinin basketbolçusu Amil Həmzəyev deyib.
Yığmanın 34 yaşlı kapitanı klassik basketbolla 3X3 növünü müqayisə edib. O bildirib ki, ölkəmizdə bu növlərin ayrılmasını istəyir: “Məcburiyyətdən 3X3 növündə oynayırıq. Başqa ölkələrdə bu idman növlərinin oyunçuları tam ayrıdırlar. 3X3 millisində olanlar digər növdə iştirak etmirlər. Amma bizdə çox basketbolçu yoxdur ki, onu ayıraq. Mənim son iştirak etməyi düşündüyüm 2025-ci ildə keçiriləcək İslam Həmrəyliyi Oyunlarıdır. Orda da 3X3 basketbolunda layiqincə çıxış etdikdən sonra həmin yarışa da fərqli modelin gətirilməsini istəyərəm. Mövsümboyu bu növlə məşğul olan gənc heyət gətirmək olar. Çünki 3X3 basketbolun yarışları apreldən başlayıb, dekabra kimi davam edir. Bunun üçün də tam gənc heyət qurulmalıdır”.
Emin Ağa
İdman.biz
