“Sumqayıt”ın basketbolçusu Kaelen Meloun klubun mətbuat xidmətinə müsahibə verib.
İdman.biz xəbər verir ki, “Ordu” ilə matçda 28 xal toplayaraq komandanın ən məhsuldar oyunçusu seçilən legioner ilk turda çıxışlarından, kollektiv daxilindəki ab-havadan və qarşıdakı “Lənkəran”la görüşdən danışıb.
- İlk oyunda məğlubiyyətdən sonra komandada ab-hava necədir?
- Məğlubiyyətdən sonra komandada atmosfer yaxşı olmadı. Oyunun əvvəlində çox səhvlər etdik. Ötürmələrdə aşağı göstəricilərlə oynadıq. Bu da qarşılaşmada böyük fərq yaratdı. Rəqib hücumda çox yaxşı idi, topla da yaxşı rəftar edirdi. Müdafiədə daha etibarlı oynamalıyıq.
- “Ordu” ilə oyunda komandada nə çatmadı?
- Ümumiyyətlə, bizdə çatışmayan komanda oyunudur. Çünki əksəriyyətimiz burada yeniyik. Hələ də bir-birimizə öyrəşməmişik. Buna baxmayaraq, çalışırıq ki, məşqçinin bizə aşıladığı taktikanı doğru həyata keçirək. Hələ ki, anlaşmada problemlər var.
- “Lənkəran”la oyuna necə hazırlaşırsız?
- Son 3 gündə məşq prosesi çox faydalı oldu. Rəqibin oyununu təhlil etmişik. Amma daha çox öz oyunumuza köklənməliyik. Hələ ki, heyətimiz kifayət qədər kompakt deyil. Əsas atışlara diqqət ayırırıq.
- Rəqibləriniz haqda nə deyə bilərsən?
- Hələ ki, bu liqada yeniyəm. Komandaları tanımağa çalışıram. İndiki vəziyyətdə hansısa komandaya üstünlük verə bilmərəm. İstənilən halda, hər oyun bizim üçün çətin olacaq. Əsas məsələ yaxşı müdafiə olunmaqdır. İlk oyunda azarkeşlər bizi çox yaxşı dəstəklədi. Bu mənim çox xoşuma gəldi.
İdman.biz
