"Növbəti həftə “Sabah”la liderlik matçına çıxacağıq".
İdman.biz xəbər verir ki, bunu bunu "Naxçıvan" basketbol klubunun baş məşqçisi Murat Dikmen deyib.
Türkiyəli mütəxəssis Azərbaycan Basketbol Liqasının 4-cü turunda "Abşeron" üzərində qazanılan 72:68 hesablı qələbəni şərh edib: "İlk olaraq “Abşeron” kollektivini təbrik edirəm, çox yaxşı komanda formalaşdırıblar. Əslində böyük fasilədən öncə artıq öz oyunumuzu göstərməyə başladıq. İkinci periodda fərqi bir qədər azaltdıq. Fasilədə basketbolçularıma oyun planını dəyişdirməli olduğumuzu bildirdim. Çünki rəqibimiz bu gün bizi yaxşı təhlil etmişdi. Müdafiədə inamlı oyunun bizə qələbə gətirəcəyini düşünürdük. Həqiqətən üçüncü və dördüncü periodda müdafiədə yaxşı oyun sərgilədik. Hələ mövsümün əvvəlindəyik və məğlubiyyətsiz davam edirik. Növbəti turda "Sabah"la görüşdə də layiqli mübarizə aparsaq, istəyimizə nail olacağıq".
Qeyd edək ki, "Naxçıvan" keçirdiyi hər 4 oyunda qələbə qazanıb.
İdman.biz
