"Quba"nın basketbolçusu Levan Qoqaladze klubun mətbuat xidmətinə müsahibə verib.
İdman.biz xəbər verir ki, gürcüstanlı legioner pley-in mərhələsində başa vurduqları mövsümü dəyərləndirib.
- Mövsüm "Quba" üçün pley-in mərhələsində başa çatdı. Komanda "Ordu"ya məğlub olaraq, iştirakını dayandırdı. Səncə, nəyə görə komanda uduzdu?
- Bu, yaxşı və qısa seriya idi. Təəssüf ki, komandaya kömək edə bilmədim. Üstəlik, ilk oyunda Zaur Paşayev meydana çıxa bilmədi. Fikrimcə, həmin seriyada meydana olsaydım, pley-offda oynayardıq.
- "Ordu"ya qarşı görüşlərdə zədəli olduğun üçün iştirak etmədin. Birinci oyundan öncə məşqdə zədələnmişdin və başına tikil atılmışdı. İndi durumun necədir?
- Bəli, qeyd etdiyim kimi komandaya kömək edə bilmədim. Oyundan öncə keçirilən məşqdə bəxtsizlik yaşadım. Başımdan zədələndim və tikiş atıldı. İndi özümü yaxşı hiss edirəm.
- Artıq üç ildir ki, ölkəmizdə legioner həyatı yaşayırsan. Azərbaycan basketbolunda inkişaf görürsən?
- Azərbaycanda basketbol inkişaf edir. Fikrimcə, oyunlara daha çox uşaq gətirmək lazımdır. Həmçinin daha mütəşəkkil baş menecerlər və bu cür bəzi addımlar da liqanın xeyrinə işləyəcək.
- Gürcüstan və Azərbaycan basketbolunu necə müqayisə edərdin?
- Fikrimcə, xarici oyunçuların səviyyəsi demək olar ki, eynidir. Çünki Azərbaycanda oynamış bir çox oyunçu əvvəllər elə Gürcüstanda da çıxış edib. Bu iki ölkə klubları arasında fərq komandalardakı intizam və yerli oyunçulardadır.
- Səncə, "Quba" müntəzəm mövsümdə də nəyə görə uğursuz çıxış etdi? B qrupunda sonuncu yerdə olmasaz da, yalnız bir pillə yuxarıda qərarlaşdınız...
- Diqqətimizi mövsümün sonuna fokuslamışdıq. Düzü, irəlidəki komanda ilə aramızda fərq də çox deyildi. Pley-in matçlarında göstərdik ki, tam heyətlə olmasaq belə, istənilən komandaya qarşı yaxşı mübarizə aparıb, yaxşı seriya əldə edə bilərdik.
- Yeni mövsümə də "Quba"da, Azərbaycan Basketbol Liasında başlayacaqsan?
- Biz bunu hələ müzakirə etməmişik. Necə olacağını zaman göstərəcək. Mən baş məşqçimiz Şəhriyar Əsgərova və kapitanımız Zaur Paşayevə hörmətlə yanaşıram. Onlara hər zaman ən yaxşısını arzulayıram.
- Səncə, ABL-də hansı komanda çempion olacaq?
- Məncə, “Sabah” yenə qalib gəlmək üçün favoritdir. Baş məşqçi Rimas Kurtinaytis çox yaxşı komanda qurub.
İdman.biz
