Çox idman növündə beynəlxalq mövsüm başa çatsa da, şahmatda buna hələ 11 gün var. O, bir çox qrossmeysterin Nyu-Yorkda qarşılayacağı Yeni ilə təsadüf edəcək. Məhz orada dekabrın 26-31-də ümumi mükafat fondu 1,5 milyon dollar olan rapid və blits üzrə dünya çempionatı keçiriləcək.
İdman.biz xəbər verir ki, sürətli şahmat üzrə dünya çempionatları ənənəvi olaraq ilin sonunda təşkil edilir.
Amma ilk dəfə bu yarışı iştirakçılar üçün əsl təəssürat ziyafəti hazırlayan Nyu-York keçirəcək. Özü də bu, sırf şahmatla bağlı olmayacaq. Axı çempionat dünyanın əsas maliyyə paytaxtlarından biri olan "Uoll Strit"də keçiriləcək.
Açıq turnirin keçiriləcəyi yer kimi Nyu-Yorkun maliyyə rayonunun mərkəzində yerləşən və tarixi memarlıq abidəsi olan "Cipriani Wall Street" seçilib. Qadınların turniri isə düz qarşı tərəfdə "48 Wall Street" ünvanında təşkil ediləcək. Bu da vaxtilə Nyu-York Bankı və Amerika Maliyyə Muzeyinin yerləşdiyi tarixi yerdir.
FIDE dünya çempionatının Nyu-Yorkda keçiriləcəyini iyunun ortalarında elan etdi və bəzi qrossmeysterlərin buna reaksiyası birmənalı olmadı.
“Başa düşmürəm ki, bu turnirlər niyə dekabrın sonunda keçirilməlidir. Bu, istənilən şahmatçı üçün ən ağır tarixdir. FIDE-də il ərzində elit şahmatçılart üçün çoxlu tədbirlər keçirilmir. Hər kəsə uyğun vaxtda oynamaq üçün beş gün ayırmaq olardı. Burada çox məqam var. Bəziləri üçün evə qayıtmaq təxminən 24 saat çəkir, bəziləri Yeni ili doğmaları ilə qeyd etmək istəyirlər. Kimlərsə Milad bayramını qeyd edir və bu tarixlərdə oynamağa hazır deyil”, – vaxtilə azərbaycanlı qrossmeyster Teymur Rəcəbov FIDE-nin qərarını belə şərh edib.
Dünya çempionatı üç yüzə yaxın şahmatçını bir araya toplayacaq. Kişilərin yarışında 180, qadınlarda isə 109 iştirakçı olacaq.
Onların arasında Azərbaycanın 15 nümayəndəsi də yer alacaq: Şəhriyar Məmmədyarov, Eltac Səfərli, Aydın Süleymanlı, Vasif Durarbəyli, Məhəmməd Muradlı, Vüqar Rəsulov, Riad Səmədov, Vüqar Manafov, Günay Məmmədzadə, Gülnar Məmmədova, Xanım Balacayeva, Ülviyyə Fətəliyeva, Gövhər Beydullayeva, Zeynəb Məmmədyarova və Türkan Məmmədyarova.
Əgər yarışın mötəbərliyi baxımından danışsaq, demək olar ki, bütün güclülər oynayacaq. Dünya çempionatının reytinqinə Maqnus Karlsen (Norveç) başçılıq edəcək, həmçinin ilk üçlükdə Fabiano Karuana (ABŞ) və Yan Nepomnyaşi (Rusiya) yer alıb. Qadınların siyahısına çinlilər Yu Vençjun, Ley Tinqje və Tan Jonqyi başçılıq edirlər.
İntriqanı daha da artırmaq üçün FIDE dünya çempionatının formatını dəyişib. Blitsdə dünya çempionatının ənənəvi strukturundan xeyli uzaqlaşma onun iki mərhələdə keçirilməsi ilə bağlıdır. Birinci mərhələ açıq yarış üçün 13 turdan, qadınların yarışında isə 11 turdan ibarət İsveçrə sistemi üzrə üç dəqiqə + hər gedişə iki saniyə vaxt nəzarəti ilə keçiriləcək. Ən güclü səkkiz şahmatçı pley-off mərhələsinə vəsiqə qazanacaq. Qarşılaşmalar dörd görüşdən ibarət olacaq.
Bura media günü və şahmat və maliyyə dünyalarını bir araya gətirən nüfuzlu "Chess Davos" konfransı da əlavə olunacaq.
Təqvimə əsasən, rapid yarışı dekabrın 26-28-də keçiriləcək, sonra istirahət günü olacaq, dekabrın 30-31-də isə iştirakçılar blitsdə mübarizə aparacaqlar.
Dünya çempionatının başlamasına 6 gün qalıb...
Zəki Feyzullayev
İdman.biz
