Sabah Nyu-Yorkda rapid və blits üzrə dünya çempionatı start götürür.
İdman.biz xəbər verir ki, 15 azərbaycanlı şahmatçının da iştirak edəcəyi mövsümün yekun yarışı ərəfəsində FIDE çempionatda qüvvələr balansını dəyərləndirib.
Bildirilib ki, bu il yarışda açıq və qadın kateqoriyalarında 300-dən çox ulduz şahmatçı iştirak edəcək. Onların arasında vaxta nəzarət baxımından müxtəlif formatlar üzrə hazırkı və keçmiş dünya çempionları, qitə və olimpiya mükafatçıları, eləcə də dünyanın hər yerindən elit qrossmeysterlər var.
Açıq yarışa klassik şahmat üzrə beşqat dünya çempionu və hazırda dünyanın bir nömrəsi Maqnus Karlsen rəhbərlik edir. Norveçli superulduz blitsdə 6, rapiddə isə 5 dəfə qalib olub.
Karlsen dünya reytinqində, müvafiq olaraq, 2-ci və 3-cü olan amerikalılar Fabiano Karuana (hazırkı ABŞ çempionu və dünya çempionu tacına keçmiş iddiaçı) və beşqat ABŞ çempionu və dünyanın ən nüfuzlu blits oyunçularından biri Hikaru Nakamura başda olmaqla, bir çox rəqiblə qarşılaşacaq. Dünyada ən populyar şahmat məzmunu yaradıcısı olduğu striminqə köklənsə də, Nakamura bütün zamanların ən yaxşı oyunçularından biri kimi zirvədə qalır.
Norveçli şahmatçı, həmçinin 21 yaşlı İran əsilli fransız Əlireza Firuzcanın təzyiqi ilə də üzləşəcək. O, bu il Karlsenin liderliyinə meydan oxuyan ən güclü oyunçulardan biri statusunu möhkəmlədib.
Turnirdə keçmiş dünya tituluna iddiaçılar, həmçinin Yan Nepomnyaşi, Boris Gelfand, Maksim Vaşye-Laqrav və Aleksandr Qrişuk da daxil olmaqla, əvvəlki blits və rapid çempionatlarının qalibləri iştirak edəcəklər.
Olimpiya komandasının üzvləri Uesli So və Lenier Dominges Peres də daxil olmaqla, ABŞ-ın bir çox tanınmış qrossmeysterləri də yarışa qatılacaqlar.
Karlsenin açıq turnirdəki üstünlüyündən fərqli olaraq, qadınların rapid və blits yarışları gözlənilməzliyi ilə məşhurdur. Aleksandra Kostenyuk, Bibisara Asaubaeva, Valentina Qunina və Katerina Laqno da daxil olmaqla, müxtəlif formatlar üzrə keçmiş və indiki dünya çempionlarının iştirak edəcəyi qadınların turnirinə çinli dünya çempionu Cu Vencun başçılıq edir. ABŞ-nin turnirdə ən yaxşı oyunçuları Alis Li, həmçinin hazırkı ABŞ çempionu Karissa Yip və keçmiş çempion İrina Kruşdur.
Qeyd edək ki, dünya çempionatına qatılacaq şahmatçılarımız Şəhriyar Məmmədyarov, Eltac Səfərli, Aydın Süleymanlı, Vasif Durarbəyli, Məhəmməd Muradlı, Vüqar Rəsulov, Riad Səmədov, Vüqar Manafov, Günay Məmmədzadə, Gülnar Məmmədova, Xanım Balacayeva, Ülviyyə Fətəliyeva, Gövhər Beydullayeva, Zeynəb Məmmədyarova və Türkan Məmmədyarovadır.
İdman.biz
