AVRO-2024-ün 1/8 final mərhələsinin Portuqaliya – Sloveniya oyunu statistik məqamlarla zəngin olub.
İdman.biz xəbər verir ki, İFFHS matçla bağlı hesabat hazırlayıb.
41 yaş 126 günlüyündə meydana çıxan Pepe final mərhələlərinin pley-offunda meydana çıxan ən yaşlı oyunçu olub. O, Piter Şiltonun rekordunu qırıb.
Kriştiano Ronaldo final mərhələlərindəki son 8 oyunda (DÇ-2022-də dörd, AVRO-2024-də dörd) qol vurmayıb.
Ronaldo AVRO-2024-də hamıdan çox – 20 zərbə endirib. Kilian Mbappe və Kay Havertsdə bu rəqəm 15-dir.
Ronaldo çərçivəyə hamıdan çox - 9 zərbə endirib.
Avropa çempionatları tarixində yalnız dörd futbolçu daha çox zərbə endirdiyi final mərhələsini qolsuz başa vurub. Deku AVRO-2004-də 24, Fernando Yerro AVRO-1996-da 23, Kevin de Bruyne AVRO-2016-da 21, Danni Olmo AVRO-2020-də 21 zərbə endirsə də, qola sevinməyib.
Ronaldo Avropa çempionatlarında 2 penalti qaçıran ilk futbolçu olub. O, AVRO-2016-da Avstriyaya da qol vura bilməyib.
Ronaldo final mərhələlərindəki 9 penaltidən 3-nü qaçırıb. Onun final mərhələlərindəki göstəricisi 67 faiz, karyerasındakı isə 85 faizdir.
Ronaldonun vurduğu penalti Avropa çempionatlarında təyin edilən 100-cü belə zərbədir. Onlardan 69-u qolla nəticələnib.
Bu, əlavə vaxtda qaçırılan ikinci penaltidir. AVRO-2020-də Harri Keyn Danimarkanın qapısına yol tapmayıb.
Portuqaliyanın Avropa çempionatlarının pley-offundakı 16 matçından 8-də əlavə vaxt oynanılıb.
Dioqo Koşta Avropa çempionatları tarixində penaltilər seriyasında 3 zərbə dəf edən və qol buraxmayan ilk qapıçıdır.
Bu, Avropa çempionatları tarixində ən qısa penaltilər seriyasıdır. Seriya cəmi 6 zərbədən ibarət olub. Əvvəlki rekord AVRO-2008-in Türkiyə - Xorvatiya matçına məxsus idi. 7 penaltidən sonra hesab 3:1 olub.
Sloveniya Avropa çempionatlarında penaltilər seriyasında qol vurmayan ilk komanda olub.
Sloveniya dünya və Avropa çempionatlarının final mərhələsini 4 oyunda 4 heç-heçə ilə başa vuran ilk komanda kimi tarixə düşüb.
Sloveniya Avropa çempionatlarının final mərhələsində qələbəsi olmayan və ən çox matç keçirən yığmadır: 6 heç-heçə və 1 məğlubiyyət.
Qeyd edək ki, Portuqaliya qolsuz bitən matçın penaltilər seriyasında 3:0 hesablı qələbə qazanıb.
İdman.biz
