“Sumqayıt”dan qələbə gözləyirik. Artıq Azərbaycan futbolu üçün yeni bir səhifə açmaq lazımdır”.
Bunu İdman.bizə “Araz-Naxçıvan”ın sabiq baş məşqçisi Azər Bağırov deyib.
O, “Sumqayıt”ın Konfrans Liqasının II təsnifat mərhələsində “Fehervar”la (Macarıstan) oyunundan gözləntilərini açıqlayıb: “Komandanın yaxşı müdafiə və orta xətti var. Düşünürəm ki, “Sumqayıt” bu gün ən üstün cəhətlərindən istifadə edəcək. Heyətlərində bir sıra dəyişikliklər oldu. Amma artıq yenilər də komandaya adaptasiya olublar. “Fehervar”ı məğlub etmək mümkündür. Onlar məhsuldar oyun nümayiş etdirirlər. Yaxşı əks-hücumlara keçirlər. Rəqibin bu tərəflərindən istifadə etmək olar. Həm də inanıram ki, bu gün azarkeşlərimizin dəstəyi də sözünü deyəcək. Bu, hətta həlledici ola bilər”.
Veteran futbolçu matçda təmsilçimizin 2:1 hesabı ilə qələbə qazanacağına da inandığını deyib.
Qeyd edək ki, “Sumqayıt” – “Fehervar” görüşü bu gün saat 20:00-da Mehdi Hüseynzadə adına Sumqayıt şəhər stadionunda start götürəcək.
Emin Ağa
İdman.biz
