"Bizi sabah çox vacib oyun gözləyir. Rəqibimiz evdə böyük istək və motivasiya ilə oynayır. İlk matçda qələbə qazanmışıq və müəyyən üstünlüyümüz var".
İdman.biz xəbər verir ki, bunu Konfrans Liqasının II təsnifat mərhələsinin cavab oyunundan əvvəl keçirilən mətbuat konfransında "Zirə"nin baş məşqçisi Rəşad Sadıqov deyib.
Gənc mütəxəssis bildirib ki, "Dunayska Streda" ilə qarşılaşmada mərhələ keçmək üçün əllərindən gələni edəcəklər: "Bakıda böyük hesabla uduzan rəqib ilk dəqiqələrdən irəli atılacaq. Biz mərhələ adlamaq üçün əlimizdən gələni edəcəyik. Bu görüşə yaxşı hazırlaşmışıq. Sabah ən yaxşı oyunlarımızdan birini keçirəcəyimizə ümid edirəm. Futbolçularımız psixoloji cəhətdən gərgin mübarizəyə hazırdırlar".
Qeyd edək ki, "Zirə" Bakıda keçirilən qarşılaşmada 4:0 hesabı ilə qalib gəlib. Cavab matçı sabah saat 22:30-da start götürəcək.
İdman.biz
