"Hisslərimi ifadə etmək çox çətindir. Elə bil ki, "Neftçi"dən heç getməmişdim. Düzdür, komandanın bazası yenilənib. Lakin komandada olan ab-hava eyni olaraq qalıb. Böyük komanda, böyük təzyiq. Öz evimə qayıdıram kimi rahat idi. Sözlə ifadə etmək çox çətindir. "Neftçi"yə qayıtdığım üçün çox xoşbəxtəm".
İdman.biz xəbər verir ki, bunu "Neftçi"nin yeni baş məşqçisi klubun televisiziyasına müsahibəsində deyib.
Təcrübəli mütəxəssis "Neftçi"nin hədəflərindən danışıb: "Bu komandanın böyüklüyündən danışmaq artıqdır. Hər kəs "Neftçi"nin necə böyük klub olduğunu yaxşı bilir. Bu klubun böyük azarkeş ordusu var. Stadiona gəlməyən azarkeşlər var ki, "Neftçi" ilə ürəkləri döyünür. "Neftçi"nin baş məşqçisinin kimliyindən asılı olmayaraq hədəfləri böyük olub. İnid komanda hazırda çətin vəziyyətdədir. Bununla belə məqsədlərimiz böyükdür. Hədəflərə uyğun baş məşqçilər dəvət olunub. Uğurlu olub və ya yox bu başqa məsələdir. "Neftçi"yə nəyə görə gəldiyimizi yaxşı bilirik. Necə olursa-olsun klub öz hədəflərinə çatmalıdır".
Baş məşqçi hazırda hansı ciddi dəyişikliklərdən danışmağın tez olduğunu dilə gətirib: "Üzərimizə düşən məsuliyyəti başa düşürük. Pik hədəflərə çatmağa çalışacağıq. Yenilənən "Neftçi"yə gəlmişik. Bu gün dəyişikliklərdən danışmaq tezdir. 1-2 oyundan sonra böyük dəyişikliklər barədə danışmaq riskdir. Çünki futbolçuların da yeni baş məşqçiyə və ideyalara uyğunlaşması lazımdır. Əlbəttə dəyişikliklər olacaq. Amma bunun üçün müəyyən vaxt lazımdır. Dünən komandanı ilk məşqə çıxardıqdan sonra buradan böyük emosiyalarla ayrıldım. Çünki futbolçularda əhval-ruhiyyə çox yüksək idi. Ümid edirəm ki, bizim dediklərimizi tezliklə qavrayıb meydançada özlərini göstərə biləcəklər".
"Neftçi"nin yeni baş məşqçisi azarkeşlərə səslənib: "Hansı klubda işləməyimdən asılı olmayaraq mənim futbolçulardan gözləntilərim böyük olub. Futbolçunun məqsədi nədirsə onlara yardım olmağa çalışmışam. Bu, prioritet olaraq qalacaq. Onlar işə düzgün yanaşsalar yenidən istəklərimizə daha tez çatacağıq."Neftçi" kimi klubda zamandan danışmaq yersizdir. Bu vəziyyətdən tez çıxmaq lazımdır. Böyük klubun böyük azarkeşi olur. Bu söz "Neftçi"nin azarkeşlərinə uyğundur. Ürəyi "Neftçi" ilə döyünən azarkeşlər var. Baş məşqçi yox, futbolçu kimi onlara səslənirəm. Bizim çox yaxşı futbolçularımız var və onların azarkeşlərə ehtiyacı var. Oyunçulardan dəstəyinizi əsirgəməyin".
Qeyd edək ki, Samir Abasov "Neftçi" ilə 2 illik müqavilə imzalayıb.
İdman.biz
