Avropa Liqasının Liqa mərhələsi ekvator xəttinə çatıb. "Qarabağ" bu xəttə çatanda mərhələdə ilk xallarını əldə edib.
İdman.biz Ağdam klubunun futbolçularının mərhələnin birinci yarısı üçün statistik göstəricilərini nəzərdən keçirib.
4 oyunda Qurban Qurbanov meydana 20 futbolçu çıxarıb. 10 futbolçu bütün oyunlarda forma geyinib. Ancaq onlardan heç biri 4 oyunu əvvəldən axıra qədər oynamayıb. Meydanda ən çox Olavio Juninyo olub – 350 dəqiqə. Abdullah Zubir 343, Bədavi Hüseynov 293, Yassin Benzia 289, Patrik Andrade 280 dəqiqə meydanda olub. Ən az oynayan Nəriman Axundzadə və Marko Veşoviç isə cəmi 1 dəqiqə şans qazanıblar.
3 qol Olavio Juninyo, Abdullah Zubir və Tural Bayramovun hesabındadır. 2 məhsuldar ötürməni Abdullah Zubir və Yassin Benzia veriblər.
"Qarabağ"ın 11 futbolçusu qapıya zərbə endirib. Juninyonun 9 zərbəsindən 4-ü qapı çərçivəsinə gedib. Benzia 7, Zubirlə Toral isə 5 zərbədən 2-sini qapı çərçivəsinə göndərib. Patrik Andradenin 3 zərbəsindən, Leandro Andrade ilə Elvin Cəfərquliyevin isə 2 zərbəsindən 1-i dəqiq olub. Emmanuel Addai 3, Abbas Hüseynov, Bəhlul Mustafazadə və Aleksey Kaşşuk 1 zərbədən qapını tapa bilməyiblər.
Benzianın 3, Addainin 2, Toral, Leandro və Elvinin 1 zərbəsi bloka alınıb.
Komandada 100 faizlik ötürmə göstəricisi tək Aleksey İsayevdədir. Ancaq o, meydanda olduğu 6 dəqiqədə cəmi 3 ötürmə verib. Bəhlul Mustafazadənin 95,7, Juloi Romaonun 94,3, Bədavi Hüseynovun 90,5 Kevin Medina və Abbas Hüseynovun 87,3 faiz ötürməsi ünvana çatıb. Ən çox ötürməni Zubir verib. Onun 213 ötürməsinin 178-i dəqiq olub. Medina 159 (139 dəqiq), Cəfərquliyev 155 (124), Benzia 146 (117), Yankoviç 146 (115), Bədavi 145 (130) ötürmə verib. Axundzadə və Veşoviç meydanda olduqları 1 dəqiqədə ötürmə verməyə imkan tapmayıblar.
Sərbəst zərbələri ən çox Mateuş Koxalski 12, Medina 11, Benzia və Yankoviç 8, Cəfərquliyev 5 dəfə yerinə yetirib.
Künc zərbələri cəmi 4 futbolçu vurub. Benzia 15, Zubir 4, Yankoviç 2, Cəfərquliyev 1 dəfə künc bayrağına yaxınlaşıb.
Juninyo 5 dəfə offsayda düşüb. Benzia, Zubir, Cəfərquliyev, Mustafazadə və Silva 1 dəfə oyundan kənar vəziyyətdə olublar.
Bədavi 24, Medina 18, Abbas Hüseynov 17, Romao 14, Patrik və Cəfərquliyev 13 dəfə topu komandasına qazandırıb.
Patrik 13, Medina 10, Romao və Benzia 6, Yankoviç 5 dəfə təkbətək mübarizədə iştirak edib.
Təhlükəni sovuşdurmaq üçün Bədavi 11, Medina və Abbas 7, Bəhlul 6, Toral 5 dəfə topu çıxarıb.
Qapıçılardan Koxalski 3 oyuna 7, Buntiç 1 oyuna 2 qol buraxıb. Seyvlərin sayı müvafiq olaraq 14 və 3-dür.
Hakimlər "Qarabağ"ın 7 futbolçusunu cəzalandırıb. Romao və Cəfərquliyev qırmızı vərəqə görüblər. Cəfərquliyev 3, Medina 2, Benzia, Yankoviş, Abbas və Koxalski 1 sarı vərəqə alıb.
Juninyo, Medina və Patrik 7, Romao 6, Benzia 5 dəfə qayda pozublar. Rəqib follarına daha çox məruz qalanlar isə Yankoviç (14), Zubir (8) və Benziadır (4).
Vüqar Məmmədov
İdman.biz
