“Qarabağ” 2024-cü ilin son avrokubok matçına çıxacaq.
İdman.biz xəbər verir ki, bu görüş ardıcıl 11-ci dəfə əsas mərhələdə oynayan Ağdam klubu üçün fərqli finiş xarakteri daşıyır.
2014-cü ildən indiyədək hər dəfə ilin son matçı həm də qrup mərhələsinin son görüşü olub. Bu dəfə isə Liqa mərhələsində hələ iki görüş qaldığından “Elfsborq”la duel yalnız ilin son qarşılaşması olacaq.
Maraqlıdır ki, Qurban Qurbanovun komandası ötən ili də İsveç klubu ilə görüşlə başa vurub. Həmin vaxt Azərbaycan çempionu “Haken”i Bakıdan məğlub yola salıb – 2:1. Bu dəfə isə oyun soyuq Skandinaviyada olacaq.
Ümumiyyətlə, Ağdam təmsilçisinin son 10 ildəki son avrokubok matçlarına nəzər salsaq, 2017-ci ildə Çempionlar Liqası, 2021-ci ildə Konfrans Liqasının qrupunda mübarizə aparan komanda digər 8 finişini Avropa Liqasında gerçəkləşdirib.
Daha bir maraqlı məqam son oyunlarının 5-nin evdə, 5-nin səfərdə keçirilməsi ilə bağlıdır. Düzdür, təmsilçimiz bu səfərlərin birinə - “Vilyarreal”la görüşə koronovirus pandemiyası üzündən yollana bilmədiyi üçün texniki məğlubiyyət alıb.
Ümumiyyətlə, ilin son görüşü səfərdə baş tutanda “Qarabağ” heç vaxt xal qazanmayıb. 5 qarşılaşmanın hamısında uduzan təmsilçimiz bu uğursuz sindromu qırmaq üçün “Elfsborq”u büdrətməlidir.
Finişdəki ev sınaqları isə daha çox heç-heçələrlə yadda qalıb. 1 qələbə və 1 məğlubiyyətin qeydə alındığı belə matçların üçü sülhlə bitib.
Bir sözlə, 10 ilin sonunda 1 qələbə, 3 heç-heçə və 6 məğlubiyyət yaşanıb. Ötən il qələbəsiz finişlər seriyasına son qoyan “Qarabağ” bunun davamını gətirmək üçün mübarizə aparacaq.
“Qarabağ” ilin son avrokubok matçında:
11.12.2014. “Qarabağ” – “İnter” – 0:0
11.12.2015. “Anderlext” – “Qarabağ” – 2:1
08.12.2016. “Qarabağ” – “Fiorentina” – 1:2
05.12.2017. “Roma” – “Qarabağ” – 1:0
14.12.2018. “Arsenal” – “Qarabağ” – 1:0
12.12.2019. “Qarabağ” – “Düdelanj” – 1:1
11.12.2020. “Vilyarreal” – “Qarabağ” - +:-
10.12.2021. “Bazel” – “Qarabağ” – 3:0
03.11.2022. “Qarabağ” – “Frayburq” – 1:1
14.12.2023. “Qarabağ” – “Haken” – 2:1
Qeyd edək ki, “Elfsborq” – “Qarabağ” matçı Bakı vaxtı ilə saat 00:00-da başlayacaq.
Vüqar Xeyrullayev
İdman.biz
