Futbolda qol vurmaq qədər buna şərait yaratmaq, yəni qol ötürmələri vermək də böyük əhəmiyyətə malikdir. Adətən statistikada əsasən qol ötürmələrinin də hesabatı aparılır. Ancaq bir sıra hallarda yaxşı ötürmələri zərbə mövqeyində olanlar qola çevirə bilmirlər. Bu zaman həmin ötürməni verənin də əməyi boşa çıxır.
İdman.biz Misli Premyer Liqasında qol ötürmələrinin, eyni zamanda bundan əlavə son zərbə mövqeyində olan futbolçunun fərqlənib-fərqlənməməsindən asılı olmayaraq, ümumi uğurlu son ötürmələrin də statistikasını nəzərdən keçirib.
Ənənəvi assistentlik, yəni qol ötürmələri üzrə cari ölkə çempionatının lideri Boyan Letiçdir (“Sabah”) - 6. Leandro Andrade (“Qarabağ”) 5, Davit Volkov (“Zirə”), Ramon (“Araz-Naxçıvan”) və Ayman Bouali (“Səbail”) 4 dəfə məhsuldar ötürmə ilə yadda qalıblar. Ümumiyyətlə, çempionatda 78 futbolçunun məhsuldar ötürməsi var.
Çempionatda 3 futbolçu həm bombardirlərin, həm də assistentlərin siyahısında ilk "onluq"da yer alıb. Bunlar Leandro Andrade (“Qarabağ”, 7+5), Davit Volkov (“Zirə”, 7+4) və Toral Bayramovdur (“Qarabağ”, 5+3). Ümumiyyətlə qol+ötürmə siyahısında Leandro Andrade (12, 7+5) ilə Davit Volkovu (11, 7+4), Coy Lens Mikels (“Sabah”, 10, 8+2) və Felipe Santos (“Araz-Naxçıvan”, 9, 8+1) izləyirlər. Toral Bayramov (8, 5+3) 5-ci pillədə qərarlaşıb.
Ümumilikdə, son zərbələrin nəticəsindən asılı olmayaraq, edilən uğurlu son ötürmələrin statistikasına keçək. Bu sahədə “Sabah”ın iki futbolçusu – Cessi Sekidika (26) və Boyan Letiç (23) öndədirlər. Bernardo Dias (“Araz-Naxçıvan”) 20, Abdullah Zubir və Yassin Benzia (hər ikisi - “Qarabağ”) 19, Ervin Koffi (“Neftçi”) 18 dəfə komanda yoldaşlarını zərbə mövqeyinə çıxarıblar.
Bu futbolçulardan Zubir daha az – cəmi 12 oyun keçirdiyindən, orta oyun göstəricisi “Qarabağ”ın bu fransalı legionerində daha yüksəkdir – 1,6. Bu baxımdan sonrakı yerləri Boyan Letiç (“Sabah”, 1,5), Cessi Sekidika (“Sabah”, 1,5), Emin Mahmudov (“Neftçi”, 1,4), Aleksey İsayev (“Qarabağ”, 1,3), Yassin Benzia (“Qarabağ”, 1,3) və Bernardo Dias (“Araz-Naxçıvan”, 1,2) tuturlar.
Vüqar Məmmədov
İdman.biz
