Futbol üzrə Azərbaycan millisi Rusiya ilə yoldaşlıq oyunu keçirə bilər.
İdman.biz xəbər verir ki, beynəlxalq yarışlardan kənarlaşdırılan şimal qonşularımızla görüşün 2025-ci ilin mart və ya iyununda baş tutması mümkündür.
Yığmamız rusiyalıların qarşılaşmaq istədiyi 24 mümkün rəqibdən biridir. Rusiya Futbol İttifaqının prezidenti Aleksandr Dyukov gələn ilin ilk yarısında Avropa yığmaları ilə qarşılaşacaqlarını bildirib: “Mart və iyunda yoldaşlıq oyunları keçirməyi planlaşdırırıq. Söhbət o cümlədən də Avropa komandaları ilə görüşlərdən gedir”.
DÇ-2026-nın Avropa zonası üzrə seçmə mərhələsindən sonra mart və iyunda rəsmi matç keçirməyəcək komandalar müəyyənləşib. 24 yığma ilin ilk yarısında yoldaşlıq matçları ilə kifayətlənəcək. Azərbaycan millisi də bu siyahıdadır.
Qeyd edək ki, millimiz payızda başlayacaq seçmə mərhələdə Fransa – Xorvatiya cütünün qalibi, İslandiya və Ukrayna ilə qarşılaşacaq.
İdman.biz
