Misli Premyer Liqasında 2024/25 mövsümünün ilk yarısı başa çatıb.
İdman.biz xəbər verir ki, iki dövrəni əhatə edən 18 turda 90 oyun keçirilib.
Bu matçlarda 20 penalti təyin olunub. 11 metrlik cərimə zərbələrindən 14-ü qolla nəticələnib. Digər 6 cəhd qeyri-dəqiq alınıb. Futbolçuların 11 metrlik nöqtədən dəqiqlik faizi 70 faiz təşkil edir.
“Turan Tovuz” hamıdan çox – 6 penalti imkanı qazanıb. Kurban Berdıyevin komandası bu şansların yarısını qaçırıb. Elə vurulmayan penaltilərin də düz yarısı qərblilərin hesabındadır.
100 faizlik nəticə göstərənlər arasında ən çox qol vuran “Araz-Naxçıvan”dır. Mövsümün sürpriz komandası “üçdə üç” edib.
Premyer Liqanın 10 komandasından 8-i belə imkan əldə edib. İki klub - “Neftçi” və “Şamaxı” “ağ nöqtə”yə yaxınlaşmayıb.
Penalti vuran klublar: “Turan Tovuz” – 6 penalti (3-ü qeyri-dəqiq), “Araz-Naxçıvan” - 3, “Sabah” – 3 (1), “Zirə”, “Qarabağ” - 2, “Kəpəz” – 2 (1), “Sumqayıt” – 1, “Səbail” – 1 (1).
Mövsümün arxada qalan hissəsində 9 komandanın qapısına penalti təyin edilib. Yalnız “Araz-Naxçıvan”ın qapısına belə zərbə təyin olunmayıb.
“Şamaxı” daha çox 5 dəfə cəzalanıb. Bu penaltilərdən dördü qolla nəticələnib.
Penalti ilə cəzalanan klublar: “Səbail”, “Şamaxı” – 4 (1), “Qarabağ”, “Sumqayıt”, “Kəpəz” – 2 (1), “Zirə” - 2, “Sabah”, “Turan” – 1, “Neftçi” – 1 (1).
Futbolçulara gəlincə, rekord və antirekord eyni ünvandadır. “Turan Tovuz”un futbolçusu Kristian da Silva hamıdan çox – 3 penalti vurub. Amma o, iki imkanı qaçıran yeganə oyunçu olub.
İki zərbədə 100 faizlik nəticəyə isə yalnız 2 futbolçu imza atıb. “Araz-Naxçıvan”da Felipe Santos, “Zirə”də Rafael Utziq bunu bacarıb.
Qeyd edək ki, cari çempionatda təxminən hər 4,5 oyuna və ya 405 dəqiqəyə bir penalti təyin olunub.
Vüqar Xeyrullayev
İdman.biz
