İtaliya A Seriyasının "Parma" - "Montsa" matçında gülməli hadisə baş verib.
İdman.biz xəbər verir ki, futbolçu hakimi düz başa düşmədiyindən hesaba alınmayan qol yaşanıb.
Qarşılaşmanın hakimi Federiko La Penna 75-ci dəqiqədə qonaqların qapısına ikinci penalti təyin edib. Lakin dərhal VAR referini epizoda baxmağa çağırıb. Bu zaman La Penna monitora getdiyini bildirmək üçün fitini səsləndirib.
"Parma"lı Adrian Benediçak isə fit səsini səhv başa düşərək penaltini yerinə yetirib. Top qapıdan keçsə də, polşalı futbolçunun bu mövsüm A Seriyasında ilk qolu qeydə alınmayıb və gülüşə səbəb olub.
Meydana qayıdan hakim cərimə meydançasında yerə yıxılan Drissa Kamaraya qarşı kobudluğun olmadığını bildirərək, penalti qərarını ləğv edib.
Qeyd edək ki, qalan vaxt ərzində komandalar hərəyə bir dəfə fərqləniblər: "Parma" qələbə qolunu 90+8-ci dəqiqədə vurub - 2:1.
İdman.biz
