2012-2013-cü illərdə "Qarabağ"ın qapıçısı olmuş xorvatiyalı Miro Varvodiçin Sportal.az saytına müsahibəsi
- “Qarabağ” bu mövsüm avrokuboklarda böyük klublardan olan "Tottenhem", "Ayaks" və "Lion"a uduzub. Amma hər üç rəqibə qarşı layiqincə mübarizə apararaq, çoxlu qol epizodu yaradıb. Uğurlu nəticənin alınmamasının səbəbi səviyyə fərqidir?
- "Qarabağ" bəzən böyük klublara qalib gələ bilir. Amma realist olmaq lazımdır. Bu klublar böyük və “Qarabağ”dan fərqlidir. “Qarabağ”da Qurban Qurbanovun gücü hiss olunur, ortaya yaxşı iş qoyub. “Tottenhem” heyətinə istədiyi oyunçunu cəlb edə bilər, bu onlar üçün çətin deyil. “Qarabağ”da isə belə deyil. Məsələn, Formula 1-də "Haas" komandasının çempion olacağını gözləmirsiniz. Çünki “Mercedes” və “Ferrari”nin daha yaxşı avtomobilləri var. Futbolda da belədir. Bütün reallıqları nəzərə alanda, “Qarabağ”ın ortaya qoyduğu iş əladır.
- Qarşıda “Qarabağ”ın iki oyunu var. Komanda hazırda Avropa Liqasında 33-cü pillədədir...
- “Qarabağ"ən 1-15-ci yerlərdə olacağını gözləyirdim. Amma bu il bəxtləri gətirmədi. Növbəti matçlarda qalib gəlmək lazımdır. Çünki “Qarabag” daha yaxşı komandadır.
- Sabiq komandan qarşıdakı görüşlərdə FCSB və “Olimpiakos”u məğlub edə bilər?
- Qurban Qurbanov işinin öhdəsindən yüksək səviyyədə gəlir. Bu mövsüm onların bəxti gətirməyə bilər, amma önəmi yoxdur. Xosep Qvardiolanın “Mançester Siti”dəki fəaliyyətini görürsüz. Sadəcə fəlakətdir. Lakin onlar yenidən qalib gəlməyə başlayacaqlar. “Qarabağ” da yenidən qələbələr qazanacaq. Hamının eniş və yüksəliş dövrü olur. “Qarabağ” həqiqətən yaxşı komandadır.
- "Qarabağ" indi daha güclü görünür, yoxsa siz bu komandada oynadığınız dövrdə?
- “Qarabağ” indi daha güclüdür. Mən uğurların yenicə başladığı vaxtda "Qarabağ"a keçmişdim. Bizim bazamız, məşq yerimiz yox idi. Hər gün məşq üçün başqa yerə getməli olurduq. İndi isə futbolçular yüksək səviyyəli klubda olan şəraitə malikdirlər. Baza var, məşq meydançası var, idman zalı var. Onlar daha da yaxşı olacaqlar. İndi klub daha mütəşəkkildir - marketinq və bütün digər məsələləri nəzərdə tuturam. Buna görə Asif Əsgərova da təşəkkür düşür (gülür).
İdman.biz
