“Qarabağ” son günlərini yaşayan 2024-cü ildə Misli Premyer Liqasında ən çox qol vuran komanda olub.
İdman.biz 99 qol vuran Ağdam klubunu əvvəlki illərin məhsuldar komandaları ilə müqayisə edib.
Qurban Qurbanovun yetirmələri ölkə çempionatlarının arxada qalan 33 ilində heç də rekordçu deyil. Bu, tarixin 3-cü nəticəsidir.
Mütləq rekord isə ilk milli çempionatda qeydə alınıb. Əhməd Ələsgərovlu “Neftçi” yaz-payız sistemi ilə keçirilən 1992-ci il mövsümündə 104 qola sevinib.
“Qarabağ”ın 5 addımlığında qaldığı həmin rekord 32 ildir əlçatmazdır. Tarixin ikinci nəticəsi də həmin mövsüm qeydə alınıb. Sumqayıt “Xəzər”i 100 qola sevinib.
Tarixin üçüncüsü olan “Qarabağ” həm XXI əsrin, həm də payız-yaz sistemli, iki mövsümün yarısını birləşdirən təqvim illərinin mütləq rekorduna imza atıb.
İkinci göstəricidə rekord “Kəpəz”ə məxsus idi. 1997/98 və 1998/99 mövsümlərinin 1998-ci ilə aid hissəsində Gəncə klubu 91 dəfə fərqlənib. Qərblilər bundan üç il əvvəl – 1995-ci ildə isə 88 dəfə rəqib qapısına yol tapıb.
XXI əsrin əvvəlki rekordu həm də “Qarabağ”ın şəxsi rekordu idi. Ağdamlılar ötən il 88 qol vuraraq tarixin 4-cü nəticəsinə şərik olublar.
Qeyd edək ki, 2024-cü ilin ikinci ən məhsuldar komandası olan “Sabah” 52 qola sevinib.
Vüqar Xeyrullayev
İdman.biz
