2024-cü ilin “The Best” mükafatı uğrunda mübarizədə 6-cı yeri tutan Lionel Messidən fərqli, Kriştiano Ronaldo sonuncu dəfə 2021-ci ildə bu mükafata namizədlər arasında yer alıb.
İdman.biz iki futbol əfsanəsinin 2024-cü ildə qazandığı titul və mükafatları xatırladır.
Messi 2024-cü ilin yayında Argentina millisi ilə Amerika kubokunun qalibi olub ki, bu da onun sözügedən yarışda ikinci çempionluğudur.
AVRO-2024 isə Kriştiano Ronaldo üçün uğursuz keçib: Portuqaliya millisi dörddəbir finalda büdrəyib, özü də yarış ərzində qol vura bilməyib.
Messi daha bir uğuru klubu “İnter Mayami” ilə yaşayıb: komanda olaraq MLS müntəzəm çempionatının qalibi kimi “Supporters' Shield” kubokunu qazanıblar. MLS kuboku uğrunda mübarizəni erkən dayandırsalar da, argentinalı ulduz liqanın “Ən dəyərli futbolçusu” mükafatına layiq görülüb.
Oktyabrda, həmçinin İspaniyanın “Marca” nəşri tərəfindən futbol tarixində ən çox titul qazanan oyunçu kimi xüsusi “Marca America Award”la mükafatlandırıb.
Kriştiano Ronaldo 2024-cü ildə klubu “Əl-Nəssr”lə titul qazanmasa da, özü 35 qolla Səudiyyə Ərəbistanı çempionatının ən məhsuldar oyunçusu olub. Ümumiyyətlə, portuqaliyalı orada oynamağa başladığı 2023-cü ilin yanvarından bəri klubla yalnız həmin ilin avqustunda Ərəb Klub Çempionları kubokunu qazana bilib.
2024-cü ilin avqustunda isə Kriştiano UEFA tərəfindən Çempionlar Liqasının bütün dövrlər ərzində ən məhsuldar futbolçusu olaraq xüsusi mükafata layiq görülüb.
Nəhayət, dekabrın sonunda o, Yaxın Şərqin ən yaxşı futbolçusu və bütün dövrlərin ən çox qol vuran oyunçusu kimi “Globe Soccer Awards” mükafatları ilə təltif olunub.
İdman.biz
