“Çox istəyərdim ki, növbəti məşqçi seçimini də düz edim”.
İdman.biz xəbər verir ki, bunu "Sumqayıt"ın baş məşqçisi Vaqif Cavadov “CBC Sport” telekanalında yayımlanan “Start” verilişində deyib.
Gənc mütəxəssis bildirib ki, daha bir məşqçi axtarışındadır: “Əvvəla, onu deyim ki, məşqçiləri uzun müddətdir tanıyıram. Hətta Vurğun Hüseynovla neçə illər bir yerdə oynamışıq. İnsani keyfiyyətlər mənim üçün çox önəmlidir. Sonra isə futbol biliyi və peşəkarlıq gəlir. İnanıram ki, belə bir sağlam kollektivdə fikirlərimizin üst-üstə düşməsi yaxşı işlərə şans yaradacaq. Düzü, əlavə bir məşqçi də axtarıram. Çox istəyərdim ki, həmin məşqçi seçimini də düz edim. İnanıram ki, yaxın zamanlarda o adam da tapılacaq. Ümumiyyətlə, indi nəyi düz bilirəmsə, gələcəkdə də o yöndə gedəcəm. Ümidvaram ki, futbolçular da bunu dərk edirlər. Məşqçinin səhvində də, düzündə də ətrafındakı insanların ona inanması çox önəmlidir. Bir baş məşqçinin köməkçiləri, xadimələri, inzibatçısı, sürücüsü, rəhbərliyi onun qərarlarına şübhə ilə yanaşırsa, deməli, o kollektiv sağlam olmayacaq. Mən gəldiyim ilk gündən etibarən futbolçulara demişəm ki, klubun ətrafında belə bir adam olsa, işindən kənarlaşdırılacaq. Şükürlər olsun ki, bu günə kimi komandamızda elə adam olmayıb və inanıram ki, bu gündən sonra da olmayacaq”.
Qeyd edək ki, 35 yaşlı mütəxəssisin köməkçiləri Şahin Abdullayev və uzun illər komandanən kapitanı olmuş Vurğun Hüseynov olacaq. Qapıçılar üzrə məşqçi vəzifəsini Emil Babayev, fiziki hazırlıq üzrə məşqçi vəzifəsini isə Gerard Martinez Bernat icra edəcək.
Aytac Sahəd
İdman.biz
