"Şamaxı"nın müdafiəçisi Rüfət Abbasovun Sportal.az saytına müsahibəsi
- "Şamaxı"nın hazırlıq prosesi necə keçir?
- Hazırlıq dönəmi yaxşı keçir. Bəzi günlər bir, bəzi günlər də isə iki məşqlə davam edirik. Fasilə normal oldu, dincələ bildik. Bizi çətin mövsümün ikinci yarısı gözləyir. Təbii ki, yaxşı hazırlaşmalıyıq.
- Yoxlama matçında “Zirə” ilə qarşılaşdınız və uduzdunuz. Bu görüşdə istədiyiniz kimi oynaya bildiniz?
- "Zirə"yə qarşı oyun yaxşı keçdi. Yoldaşlıq görüşlərində nəticələr o qədər önəmli deyil. Amma əsas odur ki, yavaş-yavaş baş məşqçimizin istədiyi oyunu göstərməyə çalışırıq.
- "Şamaxı" da ölkə xaricinə yollanmayan klublardandır. Yalnız “Turan Tovuz” hazırlıq üçün Türkiyəni seçdi. Səncə, onların digər 9 komanda ilə mübarizədə hansısa üstünlüyü ola bilər?
- Xaricə vaxt azlığına görə yollanmadıq. Həm də digər 9 komanda da buradadır. Əsasən yoxlama oyunları üçün xaricə gedirdilər. İndi o problem də yoxdur. Ölkə daxilində də hazırlığımız yüksək səviyyədə davam edir.
- Komandanız mövsümün ilk yarısını 7-ci pillədə başa vurdu. Bu pillə, ümumiyyətlə mövsümün ilk yarısındakı performansınız səncə ən yaxşısı idi?
- Mövsümə çox yaxşı başladıq. İkinci dövrədə ardıcıl məğlubiyyətlər, xal itkiləri oldu. Lakin bundan da yaxşısını edə bilərdik. Bəzi matçlarda son dəqiqələrdə ani diqqətsizlikdən qollar buraxdıq, xallar itirdik. Halbuki daha yaxşısı da mümkün idi. Hər halda, 7-ci pillədə qərarlaşmaq da pis nəticə sayılmaz.
- Artıq bir neçə transferi reallaşdırmısınız. Səncə, “Şamaxı”nın hazırkı heyəti daha güclüdür?
- Bəli, komandamıza yeni futbolçular qoşulub. İnanıram ki, bu legionerlər və yerli futbolçular komandamızı daha da gücləndirəcək. Mövsümün ikinci yarısında daha yaxşı “Şamaxı” görəcəyik.
- Necə düşünürsən, "Şamaxı" ən azından hazırkı pillədə qalmağı bacaracaq, yoxsa işlər daha da çətinləşəcək?
- Təbii ki, bizi qarşıda çətin mövsümün ikinci yarısı gözləyir. Bunu yaxşı başa düşürük. Əsas hədəfimiz Premyer Liqada qalmaqdır. Bacardığımız qədər yuxarı pillələrdə qərarlaşmaq istəyirik. Ona görə də mövsümün qalan hissəsinə daha ciddi hazırlaşırıq. İnanıram ki, istədiyimiz hədəfə çatacağıq.
- Yeni sezondan legioner limitinin tətbiq olunacağı gözlənilir. Bu legioner limitinin ləğvi azərbaycanlı futbolçualra, Azərbaycan futboluna səncə necə təsir edəcək? Limit məsələsi haqda fikrin necədir?
- Bu haqda danışmaq istəmirəm.
İdman.biz
