“FCSB üçün ağır oyun olacaq”.
İdman.biz xəbər verir ki, bunu Rumıniya Peşəkar Futbol Liqasının sabiq prezidenti Dumitru Draqomir deyib.
Öz proqnozları ilə “Belçeştdən olan orakul” ləqəbi qazanan funksioner Avropa Liqasının Bakıda keçiriləcək “Qarabağ” – FCSB oyunu barədə fikirlərini bildirib. Bakını şaxtalı şimal ölkələri ilə səhv salan Draqomir hava şəraitini önə çəkib: “Xüsusilə də havanın temperaturuna görə çətin olacaq. Şaxtanın -6, -7 dərəcə ola biləcəyini düşünürəm. Belə havada torpaq donacaq və iynələri iti olan butslar geyinmək lazım gələcək. Əgər FCSB Bakıda qalib gəlsə, deməli ağıllıdırlar və hədəflərinə çatıblar. Bunu bacarmasalar, deməli futbolda hər şey olur. Start heyəti üçün Cici Bekalinin dalınca qaçmayın. Sabah təkcə oyunçular deyil, məşqçilər də dəyişə bilər”.
Qeyd edək ki, sabah Tofiq Bəhramov adına Respublika stadionunda keçiriləcək “Qarabağ” – FCSB oyunu saat 21:45-də başlayacaq.
İdman.biz
