Avropa Liqasının “Qarabağ” – FCSB oyunu antirekordla əlamətdar olub.
İdman.biz xəbər verir ki, 2024/25 mövsümündə ilk dəfə Ağdam klubunun avrokubok görüşündə Tofiq Bəhramov adına Respublika stadionunun heç 2/3-də dolmayıb.
Yarımboş görünən tribunalarda 16 min 583 seyrçi qeydə alınıb. Bu, stadionunun tutumunun təxminən yarısından bir az çoxdur.
Cari mövsüm Avropada 7-ci ev görüşünə çıxan “Qarabağ” əvvəlki görüşlərdə belə halla üzləşməyib. Amma Qurban Qurbanovun yetirmələrinin məhz belə finişin gözlədiyini öncədən proqnozlaşdırmaq olardı.
Bunun üçün əvvəlki görüşlərin də tamaşaçı sayını nəzərdən keçirmək yetər. “Linkoln” üzərində qələbədən sonra tribunada böyük artım yaşanıb. “Lüdoqorets”ə Bakıda uduzan Ağdam klubu səfərdə mərhələ keçdiyi üçün bu artım növbəti raundda da müşahidə olunub.
Azərbaycan klubları üçün mövsümün rekordu olan göstərici Çempionlar Liqasının pley-offunda qeydə alınıb. Bundan sonra hər məğlubiyyət tamaşaçı sayının enişi ilə müşayiət olunub.
“Qarabağ” uduzduqca, azarkeşlər azalır. 29 min 800-dən sonra bu rəqəm 16 min 583 nəfərə qədər düşüb.
Amma bu o demək deyil ki, “Qarabağ”ın azarkeşləri azalır. Ağdam klubunun əsl fanatları ötən həftə “Şamaxı”ya qarşı eyni arenaya toplaşanlardır. Onlar həm daxili, həm beynəlxalq oyunlarda komandalarının yanındadır. Yeri gəlmişkən, son çempionat görüşündə tamaşaçı sayı 1010-a bərabər olub.
Azalan isə ümumilikdə ölkə futboluna azarkeşlik edən, avrokubok həyəcanını izləməyə gedənlərdir. Onları da komandanın kimliyi – “Qarabağ”, “Şamaxı” və ya “Səbail” olması deyil, nəticə maraqlandırır. Məğlubiyyətlər isə onları stadiondan uzaq salır.
“Qarabağ”ın əsl fanatları isə qarda da, yağışda da, günəş altında da, "Sportinq"ə, “Çelsi”yə, lap elə “Vorskla” və ya BATE-yə uduzanda da komanda ilədirlər. “Qarabağ” azarkeşləri iki gündən sonra yenə “Tofiq”də olacaqlar, “Turan Tovuz”la görüşdə komandalarını dəstəkləyəcəklər. Qələbədən asılı olan avrokubok fanatları isə növbəti mövsümü gözləməyə başlayıblar.
“Qarabağ”ın cari mövsümdəki avrokubok oyunlarında tamaşaçı sayı:
“Qarabağ” – “Linkoln” – 5:0 (23700)
“Qarabağ” – “Lüdoqorets” – 1:2 (29300)
“Qarabağ” – “Dinamo” – 0:2 (29800)
“Qarabağ” - “Malmö” – 1:2 (28234)
“Qarabağ” – “Ayaks” – 0:3 (27520)
“Qarabağ” – “Lion” – 1:4 (22563)
“Qarabağ” – FCSB – 2:3 (16583)
İdman.biz
