“Səbail” futbol klubunun qapıçısı Əlirza Müştəbazadə AZƏRTAC-a müsahibəsi
- Misli Premyer Liqasının XXVIII turunda səfərdə "Kəpəz"lə 1:1 hesablı heç-heçə etdiniz. Qələbə qazana bilməməyinizə nə səbəb oldu?
- Oyuna çox yaxşı hazırlaşmışdıq. Məsuliyyəti dərk edirdik. Bərabərlik qolunu vurduqdan sonra şanslarımız oldu. Təəssüf ki, yararlana bilmədik. Məğlub olmamaq da yaxşı nəticədir.
- Bu mövsüm komandanın nəticələri niyə zəifdir? Sizcə, əsas problem nədədir?
- Yaxşı məşq edirik. Futbolçular da keyfiyyətlidir. Hər oyuna böyük həvəslə çıxırıq. Əlbəttə, ardıcıl məğlubiyyətlər kollektivdə ruh düşkünlüyü yaradır. Lakin bizdə hər şey yaxşıdır. Uşaqların hamısı bir-biri ilə çox mehribandır. Problem yoxdur. İndi çətin duruma düşmüşük. Hər kəs bunu aşmaq üçün çalışır. Heç kim istəməz ki, oynadığı komanda əsas liqanı tərk etsin. Sadəcə, qələbə seriyası yaxalaya bilmirik. Bunu etsək, inanın ki, hər şey fərqli olacaq. Futbolda hər bir komandanın eniş dövrü olur. Bu cür hallar qaçılmazdır.
- Necə düşünürsünüz, "Səbail" mövsümün sonunda Premyer Liqada qala biləcəkmi?
- Tam səmimi danışacağam. Elitada qalacağımıza çox inanıram. Həyatda hər şey mümkündür. Eləcə də futbolda. Biz aşağı liqa barədə düşünmürük. Son tura qədər meydanda mübarizə aparacağıq.
- Əgər komanda Premyer Liqanı tərk etsə, növbəti mövsümdə də "Səbail"də oynamağı düşünürsünüz?
- Yenə deyirəm, aşağı liqa barədə düşünmürəm. Beynimdə bir fikir var, o da "Səbail"in Premyer Liqada qalmasıdır. Buna çox inanıram. Getməyə gəlincə, bu klubun çörəyini yeyirəm. Heç vaxt hörmətsizlik etmərəm. Başqa niyyətim olsa, kluba pislik etmiş olaram. Çətin gündə komandamın yanında olmaq istəyirəm. Meydanda son damla qanıma kimi döyüşəcəyəm.
- Bir az da öz çıxışınız barədə danışaq. Bu mövsüm özünüzü yaxşı tərəfdən göstərə bilirsiniz. Uğurlu çıxışınızın sirri nədədir?
- Cavid Hüseynovun gəlişindən sonra meydana çıxmaq şansı qazandım. Əvvəllər çıxışım istədiyim kimi deyildi. Lakin yavaş-yavaş hər şey qaydasına düşdü. Oynayan zaman inkişaf da olur. Klub mənə çox şansı verdi.
- Gənc qapıçı kimi dünya futbolunda örnək götürdüyünüz hansısa qolkiper varmı?
- İndi deyəcəyim söz insanlarda mənə qarşı fərqli fikir yaradacaq. Amma hansısa şəxsin adını çəkə bilməyəcəyəm. Mən öz üzərimdə işləyirəm. Hər qapıçıdan nəsə götürməyə çalışıram. Sırf özüm üçün ideal hesab etdiyim qolkiper yoxdur.
- Azərbaycan millisinin portuqaliyalı baş məşqçisi Fernandu Santuş sizi Belarusla yoldaşlıq oyunundan öncə yığmaya dəvət etdi. Gənc qapıçı üçün ilk dəfə ölkənin əsas yığmasının heyətində yer almaq necə hissdir?
- Bu hissi sözlə ifadə etmək çətindir. Həqiqətən də orada olmaq, müəyyən təcrübə toplamaq fantastik idi. Mənə inananlara təşəkkür edirəm. Bundan sonra da milli komandaya layiq olmağa çalışacağam. İnşallah, yığmanın növbəti toplanışlarına da dəvət alaram.
- Milli komandanın nəticələri barədə nə deyə bilərsiniz?
- Milliyə dəvət alan futbolçular burada özlərini daha yaxşı göstərmək üçün çalışirlar. Heç kim məğlub olmaq istəmir. Amma futbolda “bütün oyunlarda qalib gələcəyik” deyə bir qanun da yoxdur. İstənilən nəticələrlə rastlaşmaq olur.
İdman.biz
