"Araz-Naxçıvan"ın hücumçusu Ülvi İsgəndərovun Sportal.az-a müsahibəsi
- "Araz-Naxçıvan" son turda "Neftçi" ilə qarşılaşdı və 1:1 bərabərə qaldı. Görüş sizin üçün necə alındı, bir xaldan razı qaldız? Qələbə üçün nə çatmadı?
- Ağır səfər oyunu idi. Bunu başa düşərək yaxşı hazırlaşmışdıq. Qələbə qazanmaq istəyirdik. Hər iki komanda qələbə qazana bilərdi. Ancaq düşünürəm ki, indiki periodda bir xal da bizim üçün dəyərlidir.
- Komandanız 48 xalla 3-cü pillədədir. "Turan Tovuz" 43 xalla 4-cüdür. Onlar da qeyri-sabit çıxış edir, qələbə qazana bilmir. Yəqin ki, bu da sizi sevindirir?
- Düzünü deyim, biz daha çox öz oyunumuzu düşünürük. Qələbələr qazanaraq mövsümü medalçılar sırasında başa vurmaq istəyirik. İnanıram ki, qarşıdakı turlarda qələbələr qazanaraq hədəfimizə çatacağıq. Çünki yaxşı və güclü kollektivimiz var. Hamısı da mümkünə çevirə biləcəyimiz nəticələrdir.
- "Araz-Naxçıvan" sonuncu dəfə 20-ci turda qələbə qazanıb. Səncə, nəyə görə komandanız bu qədər uzun müddət qələbə qazana bilmir? Əsas səbəbi nədə görürsən?
- Zədəlilərimiz çox oldu. Bu da istər-istəməz komandaya təsir edir. Amma inanıram ki, 4-cü dövrədə yenidən qələbələri sıralayacağıq. Məqsədimizə çatacağımıza çox inanıram. Ümidvaram ki, istədiyimizi reallaşdıracağıq.
- Bu gün "Qarabağ”a qarşı kubokda yarımfinal görüşünə çıxacaq. Komandada "Neftçi" matçından sonra hansısa fiziki yorğunluq yoxduki?
- "Neftçi" matçından sonra vaxtımız az oldu. Düzdür, özümüzü yaxşı tərəfdən hazırlamağa çalışmışıq. Komanda olaraq oyuna köklənmişik.
- "Araz-Naxçıvan"ın "Qarabağ"ı keçərək finala adlaması realdır? İlk oyunda sizi hansı nəticə razı salacaq?
- Dediyim kimi, oyuna yaxşı hazırlaşmışıq. Əlbəttə ki, şans hər zaman var. Bu futboldur. Hər iki cəbhədə əlimizdən gələni edəcəyik. “Qarabağ”ın gücünü də hamımız yaxşı bilirik. Sona qədər mübarizə aparacağıq.
- Ölkə kubokunu qazanaraq Avropa Liqasına yollanmaq sizin üçün çox önəmlidir?
- İstənilən futbolçu titul qazanmaq istəyir. Bizim də bunun üçün şansımız var. Şansımızdan da yaxşı istifadə etmək istəyirik.
İdman.biz
