"Qarabağ"ın müdafiəçisi Bədavi Hüseynovun Sportal.az-a müsahibəsi
- "Turan Tovuz"la son görüşdə qələbə qazana bilmişdiniz. Necə alınmışdı həmin matç?
- Əla atmosfer var idi, dolu tribunalar qarşısında oynamışdıq. Başa düşürdük ki, rəqib böyük istəklə oynayacaq. Onlar yeganə komanda idi ki, bu mövsüm bizdən 7 xal almışdı. Bizim də yaxşı motivasiyamız var idi. Meydana istəkli şəkildə çıxdıq. Bəzən oyunda diqtə edən tərəf idik. Başa düşürdük ki, standart vəziyyətlərdə bizim üçün çətin olacaq. Amma təəssüf ki, elə standart vəziyyətdən qol buraxdıq. Onlar bu komponentdən yaxşı istifadə edirlər. Özümüz də standart vəziyyətdən yararlana bilərdik. Hər halda, 4 yaxşı qol vurduq və qalib gəldik. Yaxşı oyun oynadıq.
- "Turan Tovuz"a bu mövsüm ilk dəfədir ki, qalib gəlirsiz. Geridə qalan 3 oyundan nə edə bilməmişdiz ki, bu dəfə etdiniz?
- Rəqibin necə oynadığını bilirdik. Daha diqqətli olduq. Əvvəlki matçlardakı səhvləri etməməməyə çalışdıq. Yaxşı əks-hücumlar etdik. Bu da nəticə verdi.
- Hakimlik hansı səviyyədə idi?
- Yaxşı səviyyədə idi. Bəzən narazılıq olur ki, bu da normaldır. "Turan Tovuz" standart vəziyyətlər zamanı qapıçılara qarşı oynayır. Hakimə də bununla bağlı deyirdik. Məncə, yaxşı hakimlik oldu.
- Yəqin ki, bu sezon da komanda çempionluğu bayram edəcək...
- Tələsməyək. Qarşıda oyunlar çoxdur. Rahatlaşmaq istəmirsən. Çünki temp itdikdən sonra onu geri qaytarmaq da çətin olur. Oyundan-oyuna irəliləyirik. Qarşıdakı matçları düşünürük. Elə liqada növbəti matçımız "Zirə"yə qarşıdır. Onlar da bizim rəqibimizdir. Aramızda 12 xallıq fərq var. Son görüşdə də onlara uduzmuşuq. Yaxşı motivasiya ilə hazırlaşacağıq.
- "Araz-Naxçıvan"la görüş haqda nə düşünürsən?
- Kubok da bizim üçün vacib turnirdir.
- Son görüşdəki gərginlikdən sonra budəfəki oyuna da təsir edəcək?
- Xeyr. Çünki uşaqlar hamısı yadından çıxarıb olanları. Hamı yaxşı başa düşür vəziyyəti, hamımız təcrübəli oyunçularıq. Rəqib də başa düşür, biz də başa düşürük ki, hər şey meydanda qalmalıdır. Çalışacağıq ki, bu oyunda heç bir gərginlik olmayacaq. Biz də motivasiyalıyıq, onlar da. Hər halda, hər şey futbola uyğun olmalıdır.
- "Qarabağ"la müqavilən başa çatır? Legioner limiti götürülür, yaş məsələsi də var. Səncə, "Qarabağ" müqavilə imzalayacaq?
- Qurban hoca məsələyə bu cür baxmır. O futbol cəhətdən baxır vəziyyətə. Əgər futbolçu oynaya bilirsə, komandaya xeyir verirsə, onda müqavilə imzalanır. Gücüm də var. Komanda üçün maksimumu verərək ən yaxşısını etmək istəyirik.
- Milli komandanın oyunundan sonra vəziyyət necə oldu? "Qarabağ"ın oyunçuları da çox müzakirə edildi. Toral Bayramov jurnalistlərlə insident yaşadı, Elvin Cəfərquliyev qırmızı vərəqə aldı, özün də ona meydanda narazılıq bildirdin. Ümumi durum necə oldu?
- İndi nəsə demək çətindir. Uşaqlarla çox danışırıq, onları motivasiya edirik. Bilirsiz, biz yaşca böyüyük deyə, bu mənada danışırıq. Çalışırıq ki, onlarla danışaq və neqativ məsələlərə fikir verməsinlər, öz futbollarını oynasınlar. Bizə nə qalır? İşləmək lazımdır. Baş məşqçi də bunu başa düşür. Növbəti matçlarda vəziyyəti düzəltməliyik. Bunu da işləyərək edə bilərik.
İdman.biz
