“Meydana qalibiyyət üçün çıxmışdıq”.
Bunu İdman.biz-ə “Neftçi”nin futbolçusu Elvin Camalov deyib.
30 yaşlı yarımmüdafiəçi Azərbaycan kubokunun “Sabah”la ilk matçını dəyərləndirib. O bildirib ki, 1:2 hesabı ilə məğlub olsalar da, cavab qarşılaşmasında revanş almağı hədəfləyiblər: “Qələbə üçün əlimizdən gələnin ən yaxşısını etməyə çalışdıq. Stadionda abu-havanı, azarkeşlərin dəstəyini xüsusilə vurğulamaq istəyirəm. Dəstək üçün onlara təşəkkür edirəm. Düzdür, belə oyunlar adətən asan olmur. Birinci matçda çalışıb elə nəticə qazanmalısan ki, ikinci görüş daha rahat alınsın. Evimizdə oynayırdıq, qalib gəlmək üçün də çox çalışdıq, sadəcə əlimizə düşən fürsətlərdən istifadə edə bilmədik. Elə şanslarımız oldu ki, hesabda önə də keçə bilərdik. Ancaq alınmadı. Qarşıda çempionat oyunlarından sonra kubok matçını keçirəcəyik. Cavab qarşılaşmasında qələbə qazanmaq üçün əlimizdən gələnin ən yaxşısını edəcəyik”.
Qeyd edək ki, yarımfinalın cavab oyunları aprelin 23-də keçiriləcək.
Aytac Sahəd
İdman.biz
