"Turan Tovuz" avrokuboklara yollanmasa belə, mövsümü onlar üçün uğursuz hesab etmək olmaz".
İdman.biz xəbər verir ki, bunu “Turan Tovuz”un sabiq futbolçusu Rüfət Quliyev Sportal.az-a açıqlamasında deyib.
O, Tovuz təmsilçisinin hazırkı durumuna münasibət bildirib. Quliyev komandanın Misli Premyer Liqasının 28-ci turunda "Qarabağ"a məğlubiyyəti haqda danışıb, həmçinin bu gün "Səbail"ə qarşı keçiriləcək görüşdə tovuzluların şanslarını dəyərləndirib: "Turan Tovuz" "Qarabağ"la matça yaxşı start vermişdi. Özü də, onların möhtəşəm azarkeş dəstəyi var idi. Amma sonda uduzdular. Artıq ardıcıl üçüncü oyundur ki, evdə qalib gələ bilmir. Bu, mənfi haldır.
"Qarabağ" Azərbaycanın ən güclü komandasıdır. Bunu da neçə illərdir ki, həm daxili, həm də xarici oyunlarda sübut edir. Onlara da uğurlar arzulayıram. "Qarabağ"la görüşdə qırılma nöqtəsi "Turan Tovuz"un hesabda geri düşməsi oldu. Sanki futbolçularda inamsızlıq baş verdi və qalib gələcəklərinə inanmadılar. Amma "Qarabağ" da, yaxşı oynayaraq qalib gəldi.
Hər halda, mövsüm davam edir. "Səbail"lə qarşılaşacaqlar. "Turan Tovuz" "Araz-Naxçıvan"dan sonra 4-cü pillədə qərarlaşıb. Avrokubok haqda indidən bir söz demək olmaz. Mövsüm yeni başlayanda demişdim ki, "Turan Tovuz" avrokuboklara vəsiqə qazanacaq. Hələ də o şansa sahibdirlər.
Kurban Berdiyevə gəldikdə, hər bir məşqçi istəyər ki, komandası yaxşı nəticə qazansın. Azərbaycana nəyisə kiməsə sübut etməyə və ya başqa hansısa fikirlə gəlib, bu, onun özünə aid sualdır. Mən nəsə deyə bilmərəm.
Fikrimcə, "Turan Tovuz" avrokuboklara yollanmaq şansını əlindən buraxmayacaq və sona qədər mübarizə aparacaqlar ki, bunu əldə etsinlər. "Turan Tovuz" avrokuboklara yollanmasa da, mövsümü onlar üçün uğursuz hesab etmək olmaz. Onlar daha çox vəsait xərcləyib və daha çox istəklidirlər. Ancaq hər şey zaman istəyir. Bir ilə hər şeyi həll etmək olmur. Bu yola davam etsələr, daha yaxşı nəticələr əldə edə bilərlər. Lakin hələ də heç nə bitməyib, qarşıda mübarizə var. Sona qədər oynayıb, istədikləri nəticəni qazana bilərlər".
İdman.biz
