"Hazırda özümü yaxşı hiss edirəm".
Bunu İdman.biz-ə açıqlamasında veteran futbolçu, məşqçi Əfqan Talıbov deyib.
O, son dövrlərdə səhhətində yaranan problemlərdən danışıb: "Həkimin dediyinə görə, hazırda Parkinson xəstəliyinin başlanğıc mərhələsindəyəm. Müalicəmi bu istiqamətdə davam etdirirəm. Ayın 17-də müayinədən keçəcəyəm. Həmin yoxlanış zamanı hər şey daha aydın olacaq.
Qeyd edim ki, bu dövrdə futbol ictimaiyyətinin xüsusi diqqətini hiss etmişəm. AFFA, Oqtay Abdullayev başda olmaqla veteranlar şurası, futbolçu dostlarımız öz yardımlarını əsirgəmirlər".
60 yaşlı mütəxəssis yaxın müddətdə futbol fəaliyyətini bərpa etmək istədiyini deyib: "Hər şeyi izləyirəm, baxıram. Bir sözlə, futboldan kənarda deyiləm. Düzdür, səhhətimlə bağlı müəyyən problemlər olmuşdu, ancaq indi özümü normal hiss edirəm. Yəqin ki, növbəti mövsümdə yeni əməkdaşlıq təkliflərini dəyərləndirəcəyəm".
Talıbov ölkə futbolundakı yeniliklərə də münasibət bildirib: "Həm Premyer Liqada, həm də Birinci Liqada gərgin mübarizə gedir. Üç komandanın Pemyer Liqaya gələləcəyi çempionatı daha da maraqlı edir.
Legioner limiti ləğv olunduğu üçün gələn mövsümdə bizi rəqabətli və maraqlı çempionat gözləyir. Burada əsas məsələ odur ki, səviyyəsiz legionerlər Azərbaycana gəlib ehtiyat skamyasında oturmasınlar. Gələnlər futbolumuza faydalı oyunçular olsun.
Milli komandanın son məğlubiyyətləri ürəkaçan olmasa da, ümumilikdə futbolumuzdakı gedişat pozitiv düşünməyə əsas verir".
Qeyd edək ki, futbolçu kimi karyerasının böyük hissəsini "Kəpəz"də keçirən Talıbov müstəqillik dövründə "Neftçi", "Xəzri" və "Şəmkir"in formasını geyinib, Rusiyanın "Saxalin" komandasında legioner həyatı yaşayıb.
Aytac Sahəd
İdman.biz
