"Formula-1"də "Red Bull"un məsləhətçisi Helmut Marko növbəti mövsümdəki hədəflərdən danışıb.
İdman.biz xəbər verir ki, təcrübəli mütəxəssis ardıcıl 5-ci çempionluq arzusunu gizlətməyib.
O, Sebastyan Fettelə əldə edə bilmədikləri uğuru Maks Ferstappenlə yaşayacaqlarına ümid etdiyini bildirib: "Ümid edirəm ki, 2025-ci ildə ardıcıl 5-ci çempion titulunu qazana biləcəyik. İllər əvvəl motordakı dəyişikliklər səbəbindən bu uğura Sebastyan Fettellə nail ola bilməmişdik. Bu dəfə qaydalar dəyişməyib. Digər tərəfdən bütün komandaların gücü bir-birinə yaxındır, ona görə də 4 komanda arasında gərgin mübarizə gedəcək".
Qeyd edək ki, Fettel "Red Bull"la 2010-2013-cü illərdə ardıcıl 4 dəfə dünya çempionu olsa da, Lyuis Hemilton 2014-cü ildə onun hegemonluğuna son qoymuşdu. 2021-2024-cü illərdə bütün rəqiblərini qabaqlayan Ferstappen növbəti mövsüm titulunu qorumağa çalışacaq.
İdman.biz
