Naxçıvanda bədii gimnastika üzrə “Grace of nature” beynəlxalq turniri geniş vüsət alır.
Azərbaycan Gimnastika Federasiyasının (AGF) baş katibi Nurlana Məmmədzadə İdman.biz-ə yarışın xüsusiyyətlərindən və bölgələr üçün əhəmiyyətindən danışıb.
O qeyd edib ki, ilk dəfə olaraq Bakıdan kənarda gimnastika üzrə beynəlxalq turnir təşkil olunub. “Bu yarış ümummilli lider Heydər Əliyevin 100 illik yubileyinə həsr olunub və təsadüfi deyil ki, tədbirin keçirildiyi yer kimi Naxçıvan seçilib. Hazırda respublikanın otuz rayonunda bədii gimnastika bölmələri fəaliyyət göstərir və “Grace of nature”də paytaxtdan və Naxçıvandan gənc idmançılarla yanaşı, Gəncə, Ağdaş, Mingəçevir, Oğuz, Qax, Şəmkir və Zaqataladan da idmançılar iştirak edirlər. Dörd yaş qrupunda qrasiyalar çoxnövçülük və fərdi yarışlarda çıxış edir. Qrup hərəkətlərində komandalar da öz bacarıqlarını nümayiş etdirəcəklər”, - deyə N.Məmmədzadə vurğulayıb.
O, gimnastika tədbirlərinin keçirilməsinin vacibliyini də qeyd edib. “Federasiyanın regionlarda gimnastikanın inkişafı istiqamətində həyata keçirdiyi tədbirlər çərçivəsində biz regionlardan olan idmançıları və onların məşqçilərini Milli Gimnastika Arenasında təlim-məşq toplanışına dəvət edirik. Orada onlar milli komanda ilə eyni zalda məşq etmək, ölkə yarışlarına hazırlaşmaq imkanı əldə edirlər. Və onların bir çoxu indi Naxçıvanda çıxış edir. Burada ümumilikdə 250-yə yaxın gənc idmançı iştirak edir. Ümid edirik ki, onları böyük idman gələcəyi gözləyir və qrasiyalar beynəlxalq arenada uğur qazanacaqlar”, - deyə N.Məmmədzadə əlavə edib.
Azərbaycan Gimnastika Federasiyasının baş katibi “Grace of nature” turnirinin hər il keçirilməsinin planlaşdırıldığını da qeyd edib. “Onun adı “Təbiətin lütfü” kimi tərcümə olunur. Və biz turniri hər il ölkənin müxtəlif bölgələrində təşkil etməyi planlaşdırırıq. Ümid edirik ki, hər şey alınacaq”, - deyə İ.Məmmədzadə yekunlaşdırıb.
Zəki Feyzullayev
İdman.biz
