2025-ci ildə Azərbaycanda gimnastika üzrə beynəlxalq təqvimə daxil olan yeddi böyük yarış təşkil ediləcək.
İdman.biz xəbər verir ki, onlardan altısının keçirilmə tarixi artıq bəllidir.
Bakı 4 növ üzrə Dünya kuboku yarışına ev sahibliyi edəcək. Mövsümü fevralın 22-23-də Milli Gimnastika Arenasında çıxış edəcək batut və tamblinq ustaları açacaqlar.
Martın 6-9-da paytaxtımızda idman gimnastikası, aprelin 18-20-də isə bədii gimnastika üzrə Dünya kuboku yarışları keçiriləcək.
İyunun 13-15-də keçiriləcək Dünya kuboku mərhələsində iştirak etmək üçün akrobatlar da Bakıya gələcəklər.
Eyni zamanda, ilin ikinci yarısında ölkədə Avropa Gimnastikasının təqviminə daxil olan yarışlar keçiriləcək. Gəncədə aerobika üzrə Avropa çempionatı, eləcə də bu növdə yaş qrupları üzrə Avropa turnirləri keçiriləcək.
Onların keçirilmə tarixləri də artıq məlumdur. Noyabrın 9-11-də yaş qrupları üzrə yarışlar, 14-16-da isə qitə birinciliyi keçiriləcək.
Digər mühüm hadisə ötən il Bakının ev sahibliyi etdiyi bədii gimnastika üzrə II Avropa kuboku olacaq.
Avropa Gimnastikası artıq bunu əvvəlcədən elan edib. Turnirin dəqiq tarixi daha sonra müəyyənləşəcək.
Zəki Feyzullayev
İdman.biz
