“Fevralın 16-18-də Bakıda keçiriləcək “Böyük Dəbilqə”də 70-dən çox ölkədən komandaların mübarizə aparacağı gözlənilir”.
İdman.biz xəbər verir ki, bunu Azərbaycan Cüdo Federasiyasının (ACF) baş katibi Rəşad Rəsullu deyib.
O bildirib ki, iştirakçı ölkələrdən Təşkilat Komitəsinə müraciətlər həftə sonuna kimi qəbul olunacaq, sonra dəqiq rəqəm açıqlanacaq: “Parisdə keçirilən “Böyük Dəbilqə”dən sonra bir çox komandalar Bakıda iştirak üçün ərizələrini yekunlaşdıracaq. Afrika ölkələri arasında da aktivlik gözlənilir. Onlardan bəziləri bir və ya iki idmançı ilə təmsil olunacaq”.
ACF rəsmisi əlavə edib ki, Bakıya gələcək cüdoçuların sayının 400-ə yaxın olacağı gözlənilir.
Zəki Feyzullayev
İdman.biz
