Pekin-2008-in olimpiya çempionu Elnur Məmmədli cüdo üzrə Azərbaycan yığmasının Parisdəki çıxışından gözləntilərini açıqlayıb.
İdman.bizin məlumatına görə, Avropa Cüdo İttifaqının (EJU) mətbuat xidmətinə müsahibə verən Azərbaycan Cüdo Federasiyasının vitse-prezidenti Pekindəki qələbəsini də xatırlayıb.
Məmmədli qeyd edib ki, Olimpiadada qalib olmağın özünəməxsus gözəlliyi var: “Azərbaycan cüdoçularının Olimpiya Oyunlarındakı çıxışlarını kənardan izləmək məsuliyyət səviyyəsini daha da artırır. Tatamidə olanda xüsusi məsuliyyət hiss edirsən. Amma milli komandanın idmançılarının çıxışına baxanda məsuliyyət yükü daha da artır. Hər bir idmançının ən böyük arzusu Olimpiya çempionu olmaqdır. Mən də belə idmançılardan biriyəm. Olimpiya zirvəsinə yüksəlmək üçün çox çətin, lakin şərəfli yol keçdim. Koreyalı rəqibim çox hörmət etdiyim idmançı idi. Final görüşümüzə qədər 2007-ci ildə Rio-de-Janeyroda keçirilən dünya çempionatında yollarımız kəsişmişdi. Orada məğlub oldum və ikinci yerlə kifayətləndim. Bununla belə, Olimpiya Oyunlarında qələbə qazanacağıma söz verməklə özümü motivasiya etdim. Sanki taleyin yazısı imiş, ikimiz də Pekində finala çıxdıq. Xatırlatdım ki, bu, hər il keçirilən Dünya kuboku deyil, dörd ildən bir təşkil olunan Olimpiya Oyunlarıdır. Bu fürsəti əldən verə bilməzdim, ona görə də diqqətlə hazırlaşdım. Gördüyünüz kimi, döyüş çox çəkmədi. Cəmi 9 saniyə və ipponla qalib gəldim. Bu, təsvir olunmaz hissdir”.
O, Azərbaycan cüdosunda nəsillərin davamlılığını da qeyd edib: “Azərbaycanda uzun illər cüdoda olimpiya çempionu yox idi. 1992-ci ildə Nazim Hüseynov titulu qazanaraq ölkəyə ilk belə medalı gətirdi. 16 il sonra mən də onun uğurunu təkrarladım. Əminəm ki, Azərbaycan cüdo üzrə gələcək olimpiya çempionlarını yetişdirəcək”.
Məmmədli milli komandada məşqçi kimi çalışmasa da, federasiyanın vitse-prezidentidir və zəngin təcrübəsi gələcək çempiona məsləhət vermək üçün yetərincədir: “Mənim motivasiyam ondan irəli gəlir ki, bu yolu özüm getmişəm. Onun incəliklərini də dərk etmişəm. Olimpiya Oyunlarının zirvəsinə qalxaraq, biliklərimin idmançılarıma fayda verməsini istəyirəm. Getdiyim yollar, sirlər və bütün nüanslar. Olimpiya çempionu və medalçısı statusu qazanmış Azərbaycan idmançıları bizim böyük sərvətimizdir. Təbii ki, əsas amil insanın vətənpərvərliyidir. Əgər kimsə vətənini, dövlətini sevirsə, təbii ki, ardınca gələn idmançıların Avropa, dünya, olimpiya çempionu olmasını istəyir. Federasiyamızın rəhbərliyinin etimadı sayəsində cüdo ilə məşğul olmağa, biliklərimi idmançılara ötürməyə, yarışlara getməyə, onlara dəstək olmağa davam edirəm. İdmançılarımız tatamidə döyüşəndə, düşüncəmdə özümü onların yanında, idmana qayıtmış təsəvvür edir, mübarizə aparıram. Məncə, psixoloji durumum elədir ki, idmandan uzaq deyiləm, hələ də onun içindəyəm. İdmanın mahiyyəti odur ki, mən də onlarla birlikdəyəm. Özümü onların yanında cüdoçu sayıram, hər qələbəni öz qalibiyyətim kimi qeyd edirəm. Onların məğlubiyyətini də öz yenilgim bilirəm”.
Vitse-prezident Olimpiadaya hazırlığın son günlərini də dəyərləndirib: “Əlbəttə, hamı istəyir ki, olimpiya çempionu olsun. Bu, hamının dediyi sözdür. Ancaq peşəkar yanaşma çox vacibdir. Özünüzü hamıdan mümkün qədər uzaqlaşdırmaq məsləhətdir. Hər kəsin əhatəsində olanda bu sözü təkrar-təkrar eşidəcəksiniz. Ancaq bir az kənara çəkilməyə çalışmaq vacibdir. Baxış sahənizdə daha az insan olmalıdır. Bu həlledici və xüsusi gündə, 4-8 illik atletik məşqdən, nailiyyətlərdən sonra əla formada olmalısınız. Müdrik insanların nəsihətlərinə qulaq asmaqla, məşqçilərinizi dinləməklə yüksələcək və bu zirvəni fəth edəcəksiniz”.
Məmmədli 9 saniyəyə möhtəşəm qələbə qazandığı finaldan sonra yaşadıqlarını xatırlayıb: “Qızıl medal qazandıqdan sonra mənim üçün ən mühüm dəyişiklik Azərbaycan Respublikasının Prezidenti İlham Əliyevi görmək oldu. Onu yaxından görmək uşaqlıqdan arzum olub. Olimpiya çempionu kimi arzum gerçəkləşdi. Dövlətimizin başçısı birinci vitse-prezidentimiz Mehriban xanım Əliyeva ilə birlikdə mənim hər döyüşümdə olub və hər görüşümü bayrama çevirib. Mənim üçün bu, ikiqat sevinc idi - olimpiya çempionu olmaq və dövlət başçısından gül dəstəsi almaq. Ölkə rəhbəri belə bir jest edəndə hər bir azərbaycanlı özündə böyük xoşbəxtlik hiss edir.
Bunun bir də emosional elementi var idi. Lakin ən böyük xoşbəxtlik o idi ki, Azərbaycan Respublikasının birinci vitse-prezidenti şəxsən anama zəng edərək oğlunun qəhrəman olduğunu deməklə xoş sözlər çatdırdı. Məncə, hər bir uşaq üçün ən böyük sevinc valideynləri ilə fəxr etməkdir. Olimpiya Oyunlarından Azərbaycana qayıdanda ölkə başçısı dedi: “Siz mənim şəxsi təyyarəmlə və mənimlə birlikdə Azərbaycana qayıdacaqsınız”. Bu an mənim həyatımda mühüm bir fəsil, iştirak etdiyim bir hekayə oldu. 16 ildir paylaşıram və nəvələrimə deməyə davam edəcəyəm. Əslində inanıram ki, mənim həyatımda bundan böyük xoşbəxtlik yoxdur. Bu qeyri-adi təcrübə ilə heç nə müqayisə oluna bilməz”.
İdman.biz
