Tacikistanın paytaxtı Düşənbədə gənc cüdoçular arasında dünya çempionatına start verilib.
İdman.biz xəbər verir ki, mundialın ilk günündə Azərbaycan millisinin 6 idmançısı yarışa qoşulub.
Onlar 4 çəki dərəcəsində mübarizə aparırlar.
Dünya çempionatı
Oğlanlar
60 kq
Nizami İmranov yarışa qələbə ilə başlayıb. O, 1/16 finalda türkmənistanlı Meken Ramazanovu məğlub edib. İmranov 1/8 finalda Pino Balbinlə (Kolumbiya) güləşib. O, bu dueldən də qalib ayrılıb. Nizami növbəti cəhdində Vladimir Ulyanovla (İJF) münasibətinə aydınlıq gətirəcək.
66 kq
Məhəmməd Musayev 1/16 finalda Simas Polikeviçusla (Litva) qarşılaşıb. Qəbələ qazanan cüdoçumuz ikinci sınağında Hyeonsu Yunu (Koreya Respublikası) da mübarizədən kənarlaşdırıb. O, 1/4 finalda yaponiyalı Kairi Kentokunu sınağa çəkəcək.
İslam Rəhimovun ilk mərhələdə rəqibi Aik Martirosyan (Ukrayna) olub və rəqib qələbə qazanıb.
Qızlar
48 kq
Könül Əliyeva 1/16 finalda Viktoriya Sibilleni (Belçika) məğlub etsə də, ardınca Kristina Dudinaya (İJF) uduzub.
52 kq
İlk mərhələdə mübarizəyə başlayan Xədicə Qədəşova Maya Nuritdinovanı (Türkmənistan) məğlub edib. O, 1/16 finalda Kayrat Ayauylumla (Qazaxıstan) qarşılaşıb və bu görüşü də aktivinə yazıb. Təəssüf ki, Qədəşova 1/8 finalda Alissia Poulanqla (Fransa) bacarmayıb.
Aydan Vəliyeva startda bolqarıstanlı Denitsa Georgiyevadan güclü olub. O, daha sonra İlariya Fenestrondan (İtaliya) da güclü olub. Vəliyeva 1/4 finalda İroha Olla (Yaponiya) qüvvəsini sınayacaq.
Qeyd edək ki, ölkəmiz mundiala 13 cüdoçu ilə yollanıb.
İdman.biz
