Monteneqronun paytaxtı Podqoritsada keçiriləcək cüdo üzrə Avropa çempionatında iştirak edəcək Azərbaycan millisinin heyəti bəlli olub.
İdman.biz xəbər verir ki, yığmanız turnirdə 12 çəki dərəcəsində ümumilikdə 16 cüdoçu ilə təmsil olunacaq.
Millimizin 9 kişi cüdoçusu mükafatlar uğrunda mübarizə aparacaq. Olimpiya çempionlarımız Hidayət Heydərov (73 kq) və Zelim Kotsoyev (100 kq) Paris-2024-dən sonra ilk dəfə tatami üzərinə çıxacaqlar. Onlardan başqa, Əhməd Yusifov, Turan Bayramov (hər ikisi 60 kq), Ruslan Paşayev (66 kq), Zelim Tçkayev, Ömər Rəcəbli (hər ikisi 81 kq), Uşanqi Kokauri (+100 kq) da Monteneqroda mübarizə aparacaq. 90 kq çəkidə ölkəmizi təmsil edəcək iştirakçı Dubrovnikdə keçiriləcək Avropa Kubokundan sonra müəyyən ediləcək.
Qadınların yarışında 7 cüdoçumuz mübarizə aparacaq. Könül Əliyeva 48 kq, Aydan Vəliyeva və Gültac Məmmədəliyeva 52 kq, Fidan Əlizadə 57 kq, Günel Həsənli və Südabə Ağayeva 70 kq, Nigar Süleymanova +78 kq çəkidə çıxış edəcək.
Azərbaycan millisi Avropa çempionatları tarixində ilk dəfə böyüklər arasında qarışıq komanda yarışında da iştirak edəcək. Vüsal Qələndərzadə 73 kq çəkidə komandaya qoşulacaq.
Millimiz aprelin 23-27-də keçiriləcək yarışa performans direktor və böyüklərdən ibarət yığmanın baş məşqçisi Riçard Trautman, böyük məşqçilər Elçin İsmayılov, Robert Kravçik və Slavko Tekiç, qadınlardan ibarət yığmanın baş məşqçisi Amina Abdullatif və məşqçi Saşa Herkenrat-Vimarın rəhbərliyi ilə tatamiyə çıxacaqlar.
Qeyd edək ki, ümumilikdə Avropa çempionatında 45 ölkədən 429 idmançı qeydiyyatdan keçib. Beynəlxalq Cüdo Federasiyasının (IJF) bayrağı altında mübarizə aparacaq komanda ən böyük tərkibdə - 27 idmançı ilə çıxış edəcək. Fransa, Almaniya, İtaliya və Serbiya hərəyə 18 cüdoçu təmsil edəcək.
İdman.biz
