"Yaponiyada çox yaxşı təlim-məşq toplanışı keçmişik, son hazırlıqları isə Bakıda edirik”.
İdman.biz xəbər verir ki, bunu jurnalistlərə açıqlamasında kişi cüdoçulardan ibarət Azərbaycan millisinin baş məşqçisi Rixard Trautman deyib.
O, Monteneqronun paytaxtı Podqoritsada keçiriləcək Avropa çempionatına hazırlıqdan danışıb: “Olimpiya çempionlarımız da bu turnirdə iştirak edəcəklər. Bu, onların uzun müddətdən sonra ilk sınaqları olacaq. Həm Hidayət, həm Zelim yaxşı formadadır. Yarışa hələ müəyyən qədər vaxt var. İndidən nəsə demək mümkün deyil. Hazırda ciddi zədəsi olan idmançı yoxdur. Avropa və dünya çempionatında ən yaxşı nəticəni qazanmaq istəyirik. "Neçə medal qazanacağımız haqqında dəqiq nəsə deyə bilmərəm. Cüdoda hər saniyənin öz hökmü var. Ən azı iki qızıl medal istəyirik. Bu, rəqəm daha çox da ola bilər. Digər idman növlərindən fərqli olaraq cüdoda proqnoz vermək çətindir".
Mütəxəssis 90 kq-da çıxış edəcək cüdoçunun hələ bəlli olmadığını da qeyd edib: "Elcan Hacıyevin zədəsi yeni sağalıb. O vaxt Elcanın Avropa çempionu olması sürpriz deyildi. Bu dəfə Turan Bayramovdan və Ruslan Paşayevdən də qızıl medal gözləyirəm".
Qeyd edək ki, Monteneqronun paytaxtı Podqoritsada keçiriləcək Avropa çempionatı aprelin 23-dən 27-dək davam edəcək.
Aytac Sahəd
İdman.biz
