“Avstraliyada qızıl medal qazandığıma görə çox xoşbəxtəm”.
Bunu İdman.biz saytına Avstraliyanın Pert şəhərində cüdo üzrə keçirilən açıq Okeaniya turnirinin qalibi Murad Fətiyev (90 kq) deyib.
Yığma üzvü bildirib ki, özünü döyüşlər zamanı rahat hiss edib və bu amil qızıl medal qazanmasına kömək edib: “Rəqiblərim güclü idi. Ən çətin görüşüm 1/4 finalda Sami Çouçiyə qarşı oldu. Amma ona vazari xalı ilə qalib gəlməyi bacardım. Saat fərqi də müəyyən çətinliklər yaratdı. Bunlara baxmayaraq, qızıl medal qazandığım üçün xoşbəxtəm. Qarşıda məni Yaponiyada keçiriləcək “Böyük Dəbilqə” turniri gözləyir”.
Qeyd edək ki, Murad Fətiyevlə yanaşı Aydan Vəliyeva (52 kq) açıq Okeaniya turnirində bürünc medal qazanıb.
Emin Ağa
İdman.biz
