Macarıstanda tələbələrin Avropa Universitet Oyunlarında karateçilərin mübarizəsi davam edir.
İdman.bizin Mişkolts şəhərinə ezam olunmuş əməkdaşı xəbər verir ki, yarışın ikinci günündə Azərbaycan İdman Akademiyasının daha 5 idmançısı tatamiyə çıxıb.
Onların hamısı kumite növündə güclərini yoxlayıblar. Tələbələrimizdən Fərid Savadov bütün rəqiblərinə qalib gəlib. O, 1 gün sonra qızıl medal uğrunda döyüşəcək.
Kişilər
60 kq
Fərid Savadov startda Erhan Tornaçi (Buxarest İqtisadiyyat Universiteti) ilə mübarizə aparıb. Görüş 0:0 hesabı ilə başa çatsa da, hakimlər karateçimizi aktiv hesab ediblər və o, mərhələ adlayıb. Savadov ardınca Burak Özdemirdən (Qazi Universiteti, Türkiyə) də güclü olub - 3:1. O, yarımfinalda Matija Boyiçlə (Biznesin İdarə Edilməsi İnistitutu, Monteneqro) qarşılaşıb. Görüş 2:2 hesabı ilə bitib. İlk xal prinsipinə əsasən karateçimiz finala vəsiqə əldə edib. Həlledici qarşılaşma iyulun 18-də olacaq. Savadov çempionluq döyüşündə Andras Laslo (Korvinus Universiteti, Macarıstan) ilə qüvvəsini sınayacaq.
67 kq
Ramil Baxşəliyev birinci döyüşündə Mattias Kovarikla (İnsbruk Universiteti, Avstriya) gücünü yoxlayıb. Karateçimiz 5:0 hesabı ilə qalib gəlib. Baxşəliyev ikinci döyüşündə isə Ömer Faruk Ateşe (İstanbul Kent Universiteti, Türkiyə) ilk xal prinsipinə əsasən uduzub - 4:4. Türkiyəli idmançı növbəti görüşdə məğlub olduğu üçün Ramil yarışla vidalaşıb.
Qadınlar
50 kq
Fatimə Cəbrayılova ilk görüşündə İnsaf Cebarini (Valensiya Universiteti, İspaniya) sınağa çəkib və 8:0 hesabı ilə qalib gəlib. O, ardınca Nataliya Varkovaya (Trnava Universiteti, Slovakiya) 0:3 hesabı ilə uduzub. Cəbrayılova rəqibi finala yüksələ bilmədiyi üçün yarışı vaxtından əvvəl bitirib.
55 kq
Suada Kərimova startda Byanka Sodorayla (Eötvöş Lorand Universiteti, Macarıstan) üz-üzə gəlib. Azərbaycan İdman Akademiyasının tələbəsi 2:3 hesabı ilə məğlub olub. Sodoray finala yüksəldiyi üçün həmyerlimiz təsəlliverci görüşə qatılıb. O, mükafata gedən yolda Leona Markovaya (Palacki Universiteti, Çexiya) 5:3 hesabı ilə qalib gəlib. Kərimova bürünc medal uğrunda Viam Ajoubla (Barselona Universiteti, İspaniya) üz-üzə gəlib. Rəqib 4:1 hesabı ilə qələbə qazandığından Suada 5-ci yeri tutub.
61 kq
Aysu Əliyeva debütdə Tricya Sombe (Paris-Saklay Universiteti, Fransa) ilə münasibətinə aydınlıq gətirib. Görüş 3:3 hesabı ilə yekunlaşsa da, rəqib ilk xal prinsipinə əsasən mərhələ adlayıb. Fransalı ikinci qarşılaşmasında uduzduğu üçün Əliyeva Oyunlara vida edib.
Qeyd edək ki, bütün çəki dərəcələrində finallar iyulun 18-də olacaq.
İdman.biz
