“UFC döyüşçüsü Rafael Fiziyev güləş texnikasını təkmilləşdirməlidir”.
Bunu İdman.biz-in əməkdaşına Azərbaycanın qarışıq döyüş növləri (MMA) üzrə tanınmış məşqçisi Şəhriyar Abbasov deyib.
O, Fiziyevlə Castin Qetji arasında son döyüş haqqında danışıb. UFC 313 turniri çərçivəsində keçirilən döyüş hakimlərin yekdil qərarı ilə amerikalının qələbəsi ilə başa çatıb.
Abbasovun sözlərinə görə, Fiziyevin güləşdəki zəifliyi amerikalıya qalib gəlməyə imkan verməyib: “O, zərbə vurur və çəkilir, baxmayaraq ki, güləşməyi yaxşı bacaran döyüşçü zərbədən sonra döyüşü yerə keçirə bilər. Fiziyevin tay boksu və kikboksinqdə yaxşı olduğunu bilirik, amma güləşməyi zəifdir. Çoxlu xırda məqamlar var ki, yekunda bütün döyüşün nəticəsinə təsir edir”.
Onun fikrincə, Fiziyevə başqa fakt da mane olur - o, məşqçilik edir: "İdmançı kimi çıxışla məşqçiliyi birləşdirmək çox çətindir. O, birinə köklənməlidir və bir neçə istiqamətə bölünməməlidir. Ola bilsin ki, maddi səbəblərdən o həm də məşqçilik etməyə məcburdur, lakin UFC-də belə kombinasiya son dərəcə çətindir”.
O, həmçinin əlavə edib ki, yüngül çəkidə kifayət qədər böyük rəqabət var və reytinqdə yüksək yerlər uğrunda mübarizə aparmaq Fiziyev üçün asan olmayacaq. Amma düzgün yanaşma ilə Azərbaycan döyüşçüsü zirvələrə qalxmağa qadirdir.
İdman.biz
