“Məni bu ada layiq gördüyü üçün Prezident İlham Əliyevə dərin təşəkkürümü bildirirəm”.
İdman.biz xəbər verir ki, bu sözləri AZƏRTAC-a açıqlamasında Prezident İlham Əliyev tərəfindən ölkə idmanın inkişafında xüsusi xidmətlərinə və yüksək peşəkarlığına görə “Əməkdar bədən tərbiyəsi və idman xadimi” fəxri adı ilə təltif edilən kişi boksçulardan ibarət Azərbaycan millisinin böyük məşqçisi Nəriman Abdullayev deyib.
Mütəxəssis ölkə rəhbərliyinin idmana hər zaman böyük dəstək və diqqət ayırdığını vurğulayıb: “Həm Ulu Öndər Heydər Əliyev, həm də dövlətimizin başçısı Azərbaycan idmanına böyük töhfələr verib. Məhz onların sayəsində idmançılarımız beynəlxalq yarışlarda uğurla çıxış edirlər. Ümummilli Liderin dövründə olduğu kimi, Prezident İlham Əliyev də ölkə idmanını daim diqqətdə saxlayır və qazanılan uğurları qiymətləndirir. Prezidentimizin uğurlu siyasəti nəticəsində ölkəmiz yeni nailiyyətlərə imza atır”.
Abdullayev öz adını təltif olunan idman adamlarının siyahısında görəndə qürur hiss keçirdiyini vurğulayıb.
Qeyd edək ki, Prezident İlham Əliyev Azərbaycanda idmanın inkişafında xidmətlərinə görə bir qrup idmançının və idman mütəxəssisinin təltif edilməsi haqqında Sərəncam imzalayıb.
İdman.biz
