“Təbiətin oyandığı mart ayı Azərbaycan idmanı üçün də əlamətdar tarixə malikdir. 20 ildir ki, 5 mart ölkəmizdə Bədən Tərbiyəsi və İdman Gününə çevrilib. Son illərdə isə martın əvvəlini “İdman həftəsi” olaraq qeyd edirik”.
İdman.biz xəbər verir ki, bunu gənclər və idman naziri Fərid Qayıbov mart ayını dəyərləndirərkən deyib.
Nazir bu il idman günümüz Ümummilli Liderimiz Heydər Əliyevin Azərbaycan idman ictimaiyyəti ilə tarixi görüşünün 30-cu ildönümünə təsadüf etdiyini vurğulayıb: “İdmanımız üçün dönüş anına çevrilmiş həmin tarixdən ötən müddətdə dövlət qayğısı ilə əhatə olunmuş idmanımız Ulu Öndərimizin də dediyi kimi – Azərbaycanın müstəqilliyinin rəmzlərini dünyada nümayiş etdirən ən güclü vasitəyə çevrilib. Tarixi görüşün 30-cu ildönümü münasibətilə Gənclər və İdman Nazirliyinin hazırlayıb təqdim etdiyi sənədli film də elə “Dönüş anı” adlanır. 30 il öncə başlanan yola işıq salan film Heydər Əliyevin Azərbaycan idmanının inkişafında oynadığı mühüm rolu, idmançılara göstərdiyi diqqət və qayğını, eləcə də ölkəmizdə idmanın yüksəlişinə verdiyi töhfələri əks etdirir. Bu siyasəti uğurla davam etdirən dövlət başçımız cənab İlham Əliyevin qayğısı sayəsində bu idman uğurlarımız ilbəil yüksəlir”.
Qayıbov “İdman həftəsi”nə Bakıda bir sıra tədbirlərlə başlanıldığını və “İdman Paytaxtı” Qəbələdə idman paradı ilə davam ediyini bildirib: “Paradda müxtəlif idman növləri nümayiş etdirildi, idmançılar və idmansevərlər aktiv şəkildə iştirak etdilər. Qəbələdə Türk Dövlətləri Təşkilatı İdman Könüllülərinin I Forumunun açılışında da iştirak etdik. “İdman Paytaxtı” layihəsinin Qəbələdə uğurlu startına göstərdiyi dəstəyə görə Rayon İcra Hakimiyyətinə təşəkkür edirəm.
Bakıda isə “Qan ver, həyat xilas et!” aksiyası, şəhid və qazi övladları üçün buz üzərində master-klas, ahıllar üçün müxtəlif idman yarışları, uşaq evlərinin iştirakı ilə əyləncəli idman dırmanması və səyyar “Sağlam həyat” layihəsi, eləcə də idman federasiyaları, müəllimlər, tələbələr, media nümayəndələri və səfirliklər arasında badminton, bilyard, stolüstü tennis, güllə atıcılığı və şahmat kimi müxtəlif yarışlar, idman mobiloqrafiyası seminarı təşkil edildi. “Açıq idman günü” layihəsi və digər tədbirlər isə idmanın müxtəlif sahələrini əhatə edərək geniş auditoriyanı əhatə etdi”.
Nazir vurğulayıb ki, "İdman həftəsi" çərçivəsində Dənizkənarı Bulvar ərazisində təşkil olunan veloyürüşdə müxtəlif sahələrdə çalışan xanımlar iştirak ediblər: “Tədbirdə Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri xanım Leyla Əliyevanın iştirakı qadınlara idmanda aktiv iştirak etməyə və sağlam həyat tərzini seçməyə ilham verdi. İdmançılara və gənclərə verdiyi daimi dəstəyə görə Leyla xanıma dərin təşəkkürümü bildirirəm.
Ənənəyə uyğun olaraq, idman federasiyalarının rəhbərləri ilə də görüş keçirdim. Görüş zamanı idmanın inkişafı, mövcud vəziyyət və perspektivləri müzakirə etdik. Ölkəmizi beynəlxalq yarışlarda uğurla təmsil etmiş idmançılarla da görüşmək, onların təəssüratlarını dinləmək imkanım oldu. Qəbələdə isə regional idarələr, UGİM-lər və digər təşkilatların rəhbərləri ilə görüşlərim idmanın inkişafı, mövcud vəziyyətin qiymətləndirilməsi və qarşıdakı hədəflərin müəyyənləşdirilməsi baxımından əhəmiyyətli oldu”.
Qayıbovun sözlərinə görə, mart ayında gənclər və idman sahəsində əməkdaşlığın inkişafı və perspektivlərin müzakirəsi məqsədilə bir sıra görüşləri olub: “Dünya Kikboksinq Təşkilatları Assosiasiyasının (WAKO) prezidenti Roy Beyker, D-8 İqtisadi Əməkdaşlıq Təşkilatının Baş katibi İsiaka Abdulqadir İmam, Fələstinin ölkəmizdəki Fövqəladə və Səlahiyyətli Səfiri Nasser Abdul Kərimi ilə görüşlərimdə birgə layihələrin həyata keçirilməsi, gələcəkdə görüləcək işlər və qarşılıqlı maraq doğuran digər məsələləri müzakirə etdik. Həmçinin “Yüksəliş” müsabiqəsinin qalibi İnsafəli Səmədov ilə mentorluq proqramı çərçivəsində onun şəxsi inkişaf məqsədləri barədə fikir mübadiləsi apardıq.
Bu ay idmançılarımız yüksək nəticələr göstərərək dünya arenasında zirvədə yer aldılar. Bakı idman gimnastikası üzrə Dünya Kubokuna ev sahibliyi etdi. Yarışda gimnastımız Nikita Simonov qızıl medal qazanaraq ölkəmizi uğurla təmsil etdi. Bu uğur Simonovun cari mövsümdə ikinci mükafatıdır. Bu ay güləşçilərimiz də Avropa çempionatında ölkəmizi uğurla təmsil etdilər. Sərbəst güləşçilərimiz 9 medal qazanaraq komanda hesabında birinci yeri tutublar. Qadın güləşçilərimiz 2 qızıl və 1 bürünc medal qazanaraq tarixi nəticə əldə etdilər. Yunan-Roma güləşçilərimiz isə 4 medalla uğura imza atdılar”.
O, nəzərə çatdırıb ki, idman sahəsində uğurların artırılması və idmançıların beynəlxalq arenada təmsil olunmasının təşviqi məqsədilə Gənclər və İdman Nazirliyi müxtəlif təşəbbüslər həyata keçirir: “Bu məqsədlə nazirliyin Kollegiya iclasında, səsvermə nəticəsində Aliyə Paşayeva, Fəridə Əzizova, Orxan Səfərov, Dadaş Dadaşbəyli və Xəyyam Orucov 2025-ci il üçün “İdman səfiri” seçildilər. Onlar öz sahələrində yüksək nailiyyətlər əldə edərək ölkəmizi beynəlxalq arenada uğurla təmsil ediblər. Seçilmiş səfirləri təbrik edir və fəaliyyətlərində uğurlar arzulayıram.
Bakı Şəhər İcra Hakimiyyətinin Nərimanov rayonu ərazisində təşkil etdiyi Novruz şənliyində idmana xüsusi yer ayrılması da gözəl təşəbbüsdür. Kütləvi idmanın və sağlam həyat tərzinin təbliği çox vacibdir. Gənclər və İdman Nazirliyinin təşkilatçılığı ilə müxtəlif idman növləri üzrə nümunəvi çıxışlar və “Sağlam həyat” layihəsi ilə iştirakçılara aktiv və maraqlı vaxt keçirmək imkanı yaradıldı. Bu cür tədbirlər həm bayram sevincini artırır, həm də idmanın kütləviləşməsinə imkan yaradır.
Qusarda vətəndaş qəbulu çərçivəsində Quba və Qusar sakinlərini dinlədim, onları narahat edən məsələlərlə maraqlandım. Səfər zamanı həmçinin Qusar Peşə Liseyində şagirdlərlə görüşdüm, onların sosial fəaliyyəti, maraq dairələri və gələcək planlarını birlikdə müzakirə etdik. Belə görüşlərdə gənclərlə birbaşa ünsiyyət qurur, onların çətinliklərini və fikirlərini dinləyirik. Onlarla müzakirələr bizə layihələrimizi gənclərin istək və tələbatlarına uyğun qurmaq imkanı verir. Bundan əlavə, gənclər təşkilatlarının rəhbər və nümayəndələri ilə görüşdüm. Gənclər və İdman Nazirliyi yanında İctimai Şuranın təşkilatçılığı ilə baş tutan görüşdə təşkilatların fəaliyyəti, qarşıdakı planlara dair müzakirələr apardıq”.
Nazir əlavə edib ki, Gənclər və İdman Nazirliyinin elan etdiyi qrant müsabiqəsi çərçivəsində bir sıra layihələr uğurla başa çatıb: “Olimpiya hərəkatı vikipediyada”, "Postmüharibə dövründə yeni ideoloji təhdidlərlə mübarizə və milli identikliyin qorunması", “Kənd icma gənclərinin inkişafı proqramı”, "Ətraf mühitin qorunmasında region gənclərinin təşəbbüslərinə dəstək", "Dörd Yarpaqlı Yonca" və digər mövzularda keçirilən layihələr gənclərin maarifləndirilməsi, onların inkişafına dəstək verilməsi, cəmiyyətə faydalı təşəbbüslərlə çıxış etməsi baxımından mühüm rol oynayır. Quba Olimpiya İdman Kompleksində təşkil olunan “The WeekEND - II” düşərgəsi, eləcə də “Konstitusiya və Suverenlik İli” çərçivəsində həyata keçirilən təlimlərin və könüllülük hərəkatının dəstəklənməsi məqsədilə AKTİ-yə daxil olan təşkilatlar üçün könüllülər düşərgəsi də iştirakçılara həm istirahət etmək, həm də müxtəlif fəaliyyətlərlə məşğul olmaq imkanı yaratdı. Düşünürəm ki, belə düşərgələr gəncləri bir araya gətirərək, dostluq və əməkdaşlıq ruhunu gücləndirir”.
Fərid Qayıbov Azərbaycanda keçiriləcək MDB Oyunları barədə də fikirlərini bölüşüb: “Bildiyiniz kimi, ölkəmizin 7 şəhərində 23 idman növü üzrə təşkil ediləcək MDB Oyunlarına cəmi 6 ay qalır. Oyunlara hazırlıq işləri plan üzrə davam edir. İnanıram ki, bu Oyunlar bölgələrimizdə idmanın inkişafına və populyarlaşmasına dəstək olacaq. Həmçinin ölkə başçısı cənab İlham Əliyevin tapşırığına əsasən, Oyunların keçiriləcəyi şəhərlərdə, idman qurğularında əsaslı təmir, yenidənqurma və abadlıq işləri aparılır. Bütün bunlar Oyunlardan sonra da regionlarımıza dəyərli bir miras kimi qalacaq. İnanıram ki, Azərbaycan bu mühüm tədbiri də yüksək səviyyədə təşkil edəcək və bu Oyunlar ölkəmizdə əsl bayrama çevriləcək”.
Onun sözlərinə görə, idman həftəsi ilə başlanan mart ayının əsas hadisəsini – xalqımızın qədim bayramı olan Novruzu nazirliyin kollektivi ilə #birkimibirlikdə qeyd edilib: “İnanıram ki, baharın gəlişi və təbiətin yenidən canlanması gənclərimizi ilhamlandıracaq, idmançılarımıza isə güc verəcək, yeni ümidlər və qələbələr gətirəcək”.
İdman.biz
