“Mart ayından bütün diqqətimizi yarış mövsümünün hazırlığına yönəltmişik”.
İdman.biz xəbər verir ki, bunu Avropa Gimnastikasının (EG) prezidenti Fərid Qayıbov rəhbərlik etdiyi qurumun saytında ənənəvi “Prezidentin qeydləri” rubrikasında deyib.
O, ötən ayın mühüm hadisələrini qeyd edib: "Səkkiz Texniki Komitəmizdən bir neçəsi öz fəaliyyət planını və tədbirləri müzakirə etmək üçün görüş keçiriblər. Bu görüşlər seminarlar, təlim-məşq toplanışları və yarışların uğurlu təşkili üçün vacibdir, həmçinin yeni və yaxud təkmilləşdirilmiş formatlar üzrə fikir mübadiləsinə və müxtəlif növlərin təbliğinə imkan verir.
Bundan əlavə, Texniki Komitələr və əməkdaşlar idman gimnastikası və bədii gimnastika üzrə qarşıdakı Avropa çempionatlarının keçiriləcəyi şəhərlərə səfər ediblər. Yarışların texniki təşkili ilə məşğul olaraq diqqətimizi son məqamlara yönəldib, Leypsiq (Almaniya) və Tallindəki (Estoniya) yerli təşkilat komitələri ilə əməkdaşlıq edərək, bu tədbirləri ən yüksək səviyyədə keçirməyə çalışırıq”.
Fərid Qayıbov əlavə edib ki, gimnastlar beynəlxalq yarışlarda yeni proqramlarını test etməyə başlayıblar: “Bütün bu hazırlıqlar bizə iki həftə çıxışların sehrini bəxş edəcək. Əvvəlcə Leypsiqdə qeyri-adi Almaniya gimnastika festivalı "Turnfest"in mərkəzində olacağıq. On minlərlə gimnastika həvəskarının əhatəsində olmaq, şübhəsiz, hər iki tədbirin enerjisini artıracaq. Ümid edirik ki, ulduzların çıxışları daha bir nəslə ilham verəcək. Bundan dərhal sonra parlamaq növbəsi Tallinnə çatacaq. Estoniyanın paytaxtı ilk dəfə Avropa gimnastika tədbirinə ev sahibliyi edəcək”.
Avropa Gimnastikasının rəhbəri Lüksemburqda keçiriləcək akrobatika üzrə Avropa çempionatına hazırlıqdan söz açıb: “Bir həftə sonra Avropanın ən yaxşı yeniyetmə və böyük akrobatları qitə şöhrətini qazanmaq uğrunda mübarizə aparacaqlar. Yarış "Coque Arena"da baş tutacaq və canlı yayımlanacaq".
Fərid Qayıbov bədii gimnastika üzrə qarşıdakı Avropa kuboku seriyasından da danışıb: "Keçən il start götürən bədii gimnastika üzrə Avropa kuboku bu mövsüm də keçiriləcək. Özü də bir yox, iki mərhələdə! Mayın ilk həftəsonu mənim doğma şəhərim Bakıda olacaq - orada olmaq lazımdır. İki həftədən sonra diqqət Bolqarıstanın sahil şəhəri Burqasa yönələcək. Gördüyünüz kimi, qarşıdakı aylarda çox maraqlı hadisələr gözlənilir! Hamınıza gözəl yarış mövsümü arzulayıram!
İdman.biz
