Alfonso Dominqes Paris-2024 Yay Olimpiya Oyunlarının medalını təmin edib.
İdman.biz xəbər verir ki, 92 kq çəkidə çıxış edən boksçumuz buna yarımfinala vəsiqə qazanmaqla nail olub.
İdmançımız 1/4 final səddini adlamaqla ən azı bürüncə sahib çıxacaq. Bu, Alfonsonun Olimpiadalar tarixində 2-ci medalı olacaq.
O, Azərbaycan boksu tarixində ikiqat Olimpiya mükafatçısı olan ilk idmançıdır. Alfonsoya qədər heç bir boksçumuz belə uğura imza atmayıb.
Azərbaycan boks millisi tarixində 10-cu Olimpiya medalını əldə edib. Paris-2024-ə qədər təmsilçilərimiz bir gümüş və səkkiz bürüncə sahib çıxıb. Alfonsodan başqa digər boksçular hərəyə bir dəfə sevinib.
Qeyd edək ki, yığmamız Paris-2024-də daha bir medal qazana bilər. Murad Allahverdiyev 80 kq çəkidə 1/4 final döyüşünə çıxacaq.
Vüqar Xeyrullayev
İdman.biz
